തിരുവനന്തപുരം: നിയമനക്കത്ത് വിവാദത്തില്‍ തിരുവനന്തപുരം കോര്‍പറേഷനില്‍ ബി.ജെ.പി- സി.പി.എം കൗണ്‍സിലര്‍മാര്‍ തമ്മില്‍ കൈയ്യാങ്കളി. വനിതാ കൗണ്‍സിലര്‍മാര്‍ അടക്കമുള്ളവര്‍ തമ്മില്‍ വാക്കേറ്റമുണ്ടായി. സ്ഥലത്ത് സംഘര്‍ഷാവസ്ഥ തുടരുകയാണ്.

രാവിലെ പ്രകടനമായെത്തിയ ബി.ജെ.പി കൗണ്‍സിലര്‍മാര്‍ മേയര്‍ക്കെതിരെ മുദ്രാവാക്യം വിളിച്ചു. ഇതിനുശേഷം കോര്‍പറേഷന്റെ പ്രധാന കെട്ടിടത്തിലെ ഗ്രില്‍ തുറക്കണമെന്ന് ആവശ്യപ്പെട്ട് ബി.ജെ.പി കൗണ്‍സിലര്‍മാര്‍ പ്രതിഷേധിച്ചു. ഇതോടെ ബി.ജെ.പി. കൗണ്‍സിലര്‍മാര്‍ സി.പി.എം. കൗണ്‍സിലറും ക്ഷേമകാര്യ സ്റ്റാന്‍ഡിങ് കമ്മിറ്റി ചെയര്‍മാനുമായ സലീമിനെ അദ്ദേഹത്തിന്റെ ഓഫീസിലും പൂട്ടിയിട്ടു. തുടര്‍ന്നാണ് ഇരുവിഭാഗം കൗണ്‍സിലര്‍മാര്‍ തമ്മില്‍ കയ്യാങ്കളിയുണ്ടായത്.

പൊലിസെത്തി ബി.ജെ.പി കൗണ്‍സിലര്‍മാരെ സ്ഥലത്തുനിന്ന് നീക്കാന്‍ ശ്രമിച്ചു. ഇതിനിടയില്‍ ബി.ജെ.പി കൗണ്‍സിലര്‍മാരില്‍ ഒരാള്‍ ദേഹാസ്വാസ്ഥ്യത്തെ തുടര്‍ന്ന് തളര്‍ന്നുവീണു. വനിതാ കൗണ്‍സിലര്‍മാര്‍ തമ്മില്‍ ഉന്തും തള്ളുമുണ്ടായി.