നെറ്റിസണ്‍സിന്റെ ശ്രദ്ധപിടിച്ചുപറ്റാന്‍ ആളുകള്‍ ഒരുപാട് വിചിത്രമായ കാര്യങ്ങള്‍ പരീക്ഷിച്ചുനോക്കാറുണ്ട്. രണ്ട് വ്യക്തികള്‍ അസാധാരണമായ രീതിയില്‍ ഗോവണി കയറുന്ന വിഡിയോ ഇപ്പോള്‍ സാമൂഹിക മാധ്യമമായ റെഡ്ഡിറ്റില്‍ തരംഗമാണ്. മറ്റൊരാളെ തലകീഴായി തന്റെ തലയില്‍ കുത്തനെ ഉയര്‍ത്തിനിര്‍ത്തിയാണ് ഗോവണി കയറുന്നത്. രണ്ടു തലകള്‍ തമ്മില്‍ മാത്രമാണ് ബന്ധം.

വിഡിയോ കണ്ടാല്‍ ആരും അമ്പരന്നുപോകും. ഒരു ഗോവണിപ്പടിക്ക് സമീപം രണ്ട് പുരുഷന്മാര്‍ നില്‍ക്കുന്നതാണ് തുടക്കം. താമസിയാതെ, ഒരാള്‍ മറ്റൊരാളെ തലകീഴായി ഉയര്‍ത്തുന്നു. ഏതാണ്ട് ഒരു കടലാസ് പോലെ ഭാരം കുറഞ്ഞവനാണ് മറ്റേയാളെന്ന് തോന്നുംവിധമാണ് തലയിലേക്ക് എത്തുന്നത്. പിന്നീട് ആ മനുഷ്യന്‍ മറ്റേയാളെ പിടിക്കാതെയും തൊടാതെയും ഗോവണി കയറുന്നു. അവരുടെ തലകള്‍ മാത്രമാണ് പരസ്പരം സ്പര്‍ശിക്കുന്നത്. രണ്ട് തലകള്‍ തമ്മില്‍ ചേരുമ്പോള്‍ അദ്ഭുതകരമായ കാര്യങ്ങള്‍ സംഭവിക്കുന്നുവെന്ന് വിഡിയോക്ക് താഴെ ഒരാള്‍ കമെന്റ് ചെയ്തു. രണ്ട് ഇഷ്ടക്കാര്‍, ഒറ്റ ഗോവണി എന്ന കുറിപ്പോടെയാണ് റെഡ്ഡിറ്റില്‍ ദൃശ്യം പങ്കുവച്ചിരിക്കുന്നത്.