ദുബൈ: അധികം വൈകാതെ അബൂദബി എയര്‍പോര്‍ട്ടില്‍ നിന്നും താമസസ്ഥലത്തേക്ക് പറക്കും ടാക്‌സിയില്‍ പോകാം.അബൂദബി എയര്‍പോര്‍ട്സും ഫ്രഞ്ച് കമ്പനിയായ ഗ്രൂപ് എ.ഡി.പിയുമായി ധാരണപത്രത്തില്‍ ഒപ്പുവച്ച വാര്‍ത്തകാളാണ് പുറത്തു വന്നത്. ഇലക്ട്രിക് വെര്‍ട്ടിക്കിള്‍ ടേക്ക് ഓഫ് ആന്‍ഡ് ലാന്‍ഡിങ്ങിന് ഉപയോഗിക്കുന്ന നവീന വ്യോമഗതാഗത ആശയമായ അഡ്വാന്‍സ്ഡ് എയര്‍ മൊബിലിറ്റി സാധ്യതയുടെ ഭാഗമായുള്ളതാണ് കരാര്‍. അബൂദബി എയര്‍പോര്‍ട്ട് മാനേജിങ് ഡയരക്ടറും സി.ഇ.ഒയുമായ ജമാല്‍ സലിം അല്‍ ദാഹിരിയാണ് ഇക്കാര്യം പങ്കുവച്ചത്. അബൂദബി എയര്‍ എക്സ്പോ 2022ന്റെ ഭാഗമായി അല്‍ദാഹിരിയും എ.ഡി.പി എയര്‍പോര്‍ട്സ് സര്‍വിസസ് മാനേജിങ് ഡയറക്ടര്‍ ഫിലിപ് മാര്‍ട്ടിനറ്റും തമ്മില്‍ കരാര്‍ ഒപ്പു വച്ചിട്ടുണ്ട്. എയര്‍പോര്‍ട്ടില്‍ എത്തുന്നവര്‍ക്ക് അധികം വൈകാതെ പറക്കും ടാക്സികളില്‍ ഹോട്ടലുകളിലേക്കോ വീടുകളിലേക്കോ പോകാനാവുമെന്ന് അധികൃതര്‍ വെളിപ്പെടുത്തി. വൈദ്യുതോര്‍ജം ഉപയോഗിച്ചാണ് ഇവ പറക്കുക. യാത്രക്കാര്‍ക്കും ചരക്കുനീക്കത്തിനായുമെല്ലാം ഈ സംവിധാനം ഉപയോഗപ്പെടുത്താനാവും.