ഷിംല: പ്രരസ്യ, നിശബ്ദ പ്രചാരണങ്ങൾ അവസാനിച്ചു. ഹിമാചൽപ്രദേശ് ഇന്ന് പോളിങ് ബൂത്തിലേക്ക്. ബി.ജെ.പിയും കോൺഗ്രസും നേരിട്ടേറ്റുമുട്ടുന്ന ഹിമാചലിൽ ഇത്തവണ ശക്തമായ പ്രചാരണവുമായി ആം ആദ്മി പാർട്ടിയും രംഗത്തുണ്ട്. ഡിസംബർ എട്ടിനാണ് വോട്ടെണ്ണൽ.

തെരഞ്ഞെടുപ്പുസർവേകളിൽ ചിലത് ബി.ജെ.പിക്ക് അനുകൂലമാണെങ്കിലും തൂക്കുസഭവരുമെന്ന് പ്രവചിച്ച സർവേകളും ഉണ്ട്. മിക്ക സർവേകളും മുൻ തെരഞ്ഞെടുപ്പുകളെ അപേക്ഷിച്ച് ബി.ജെ.പിക്ക ്‌സീറ്റ് കുറയുമെന്നാണ് പ്രവചിച്ചത്. എ.എ.പിക്കും സി.പി.എമ്മിനും ഒന്ന് മുതൽ മൂന്നുവരെ സീറ്റ് ലഭിക്കുമെന്ന പ്രവചനവുമുണ്ട്. ബി.ജെ.പിക്ക് വേണ്ടി പ്രധാനമന്ത്രി നരേന്ദ്രമോദിയും മുഖ്യമന്ത്രി ജയ്‌റാം താക്കൂറും അടക്കമുള്ളവരാണ് പ്രചാരണം നയിച്ചത്. ബി.ജെ.പി അധ്യക്ഷൻ ജെ.പി നദ്ദ സംസ്ഥാനത്ത് തമ്പടിച്ച് പ്രചാരണത്തിന് തേൃത്വം നൽകുകയുമുണ്ടായി.

എ.ഐ.സി.സി ജനറൽ സെക്രട്ടറി പ്രിയങ്ക ഗാന്ധിയാണ് കോൺഗ്രസിന്റെ പ്രചരണം നയിച്ചത്. ഭാരത് ജോഡോ യാത്രയുടെ ഭാഗമായ രാഹുൽഗാന്ധി പ്രചാരണത്തിനിറങ്ങിയിട്ടില്ല. സംസ്ഥാനത്തെ ഭരണവിരുദ്ധ വികാരത്തിലാണ് കോൺഗ്രസിന് പ്രതീക്ഷ. പാർട്ടി ഭരണത്തിലുള്ള ഡൽഹിയോടും പഞ്ചാബിനോടും ചേർന്നുകിടക്കുന്ന ഹിമാചലിൽ സാന്നിധ്യം ഉറപ്പിക്കലമാണ് എ.എ.പിയുടെ ലക്ഷ്യം.
ജനകീയ വിഷയങ്ങളിൽ ഊന്നിയായിരുന്നു കോൺഗ്രസ് പ്രചാരണം. വിലക്കയറ്റം, തൊഴിലില്ലായ്മ, ആപ്പിൾ കർഷകരുടെ പ്രശ്‌നങ്ങൾ എന്നിവ കോൺഗ്രസ് ഉയർത്തി. എന്നാൽ, ഏകസിവിൽകോഡ് അടക്കം വർഗീയ പ്രചാരണത്തിലാണ് ബി.ജെ.പി ശ്രദ്ധിച്ചത്. ഭരണവിരുദ്ധ വികാരത്തിനൊപ്പം വിതമനീക്കങ്ങളും ബി.ജെ.പിക്ക് തലവേദനയാണ്. 1985 മുതൽ ഹിമാചലിൽ ഒരു പാർട്ടിക്കും ഭരണ തുടർച്ച ലഭിച്ചിട്ടില്ലെന്നാണ് ചരിത്രം.

Himachal Pradesh elections 2022 Live Updates