വയനാട്: തെളിവെടുപ്പിനിടെ പോക്‌സോ കേസ് ഇരയെ പീഡിപ്പിക്കാന്‍ ശ്രമിച്ച കേസില്‍ സി.ഐ കസ്റ്റഡിയില്‍. കോഴിക്കോട് കോസ്റ്റല്‍ പൊലിസ് ഇന്‍സ്‌പെക്ടര്‍ പി.ആര്‍ സുനുവാണ് കസ്റ്റഡിയിലായത്. തൃക്കാക്കരയില്‍ രജിസ്റ്റര്‍ ചെയ്ത പീഡനക്കേസിലാണ് നടപടി. കേസില്‍ മൂന്നാം പ്രതിയാണ് സുനു.

പരാതിയില്‍ അമ്പലവയല്‍ എ.എസ്.ഐ ബാബുവിനെ നേരത്തെ സസ്‌പെന്‍ഡ് ചെയ്തു. വയനാട് എസ്.പിയുടെ റിപ്പോര്‍ട്ടിന്റെ അടിസ്ഥാനത്തിലാണ് നടപടി.

പട്ടികജാതി വിഭാഗത്തിലെ പതിനേഴുകാരിയെയാണ് ഇയാള്‍ പീഡിപ്പിക്കാന്‍ ശ്രമിച്ചത്. കണിയാമ്പറ്റ നിര്‍ഭയ ഹോമില്‍ താമസിക്കുന്ന പോക്‌സോ കേസ് ഇരയെ തെളിവെടുപ്പിനായി ഊട്ടിയിലേക്ക് കൊണ്ടുപോയപ്പോള്‍ പീഡിപ്പിക്കാന്‍ ശ്രമം നടന്നു എന്നതായിരുന്നു പരാതി.

പ്രാഥമികാന്വേഷണത്തിലെ കണ്ടെത്തലുകളെ തുടര്‍ന്നാണ് എ.എസ്.ഐ ബാബുവിനെ അന്വേഷണ വിധേയമായി സസ്‌പെന്‍ഡ് ചെയ്തത്.