കാബൂള്‍: അഫ്ഗാനില്‍ നിന്ന് യു.എസ് സൈനികരുടെ പിന്മാറ്റവും ആളുകളെ ഒഴിപ്പിക്കുന്നതും അന്തിമഘട്ടത്തിലെത്തിനില്‍ക്കെ കാബൂള്‍ വിമാനത്താവളത്തിനു നേരേ വീണ്ടും റോക്കറ്റ് ആക്രമണം.
ഇന്നലെ രാവിലെ പന്ത്രണ്ട് റോക്കറ്റുകളാണ് വിമാനത്താവളം ലക്ഷ്യമാക്കി എത്തിയത്. എന്നാല്‍ വിമാനത്താവളത്തിലെ മിസൈല്‍വേധ സംവിധാനമുപയോഗിച്ച് അവയിലേറെയും ലക്ഷ്യത്തിലെത്തുന്നതിനു മുമ്പേ തകര്‍ത്തതായി യു.എസ് ഉദ്യോഗസ്ഥന്‍ അറിയിച്ചു. ചിലത് കാബൂളിന്റെ സമീപ പ്രദേശങ്ങളില്‍ പതിച്ചതായും റിപ്പോര്‍ട്ടുകളില്‍ പറയുന്നു.
എന്നാല്‍ ആളപായമുണ്ടായതായി റിപ്പോര്‍ട്ടില്ല. ആരാണ് റോക്കറ്റുകള്‍ വര്‍ഷിച്ചതെന്നു വ്യക്തമല്ല. എന്നാല്‍ ഇക്കാര്യം അന്വേഷിക്കുമെന്ന് താലിബാന്‍ വ്യക്തമാക്കി. പിന്‍ഭാഗത്ത് റോക്കറ്റ് ലോഞ്ചറുകള്‍ ഘടിപ്പിച്ച നിലയില്‍ ഒരു കാര്‍ കണ്ടെത്തിയതായി റിപ്പോര്‍ട്ടുണ്ട്. അതേസമയം ഇനിയും ആക്രമണമുണ്ടായേക്കാമെന്ന് യു.എസ് മുന്നറിയിപ്പു നല്‍ണ്ട്യിട്ടുണ്ട്. റോക്കറ്റ് ആക്രമണം വിമാനത്താവളത്തില്‍ നിന്ന് യു.എസ് പൗരന്മാരെയും സഹകാരികളെയും ഒഴിപ്പിക്കുന്നതിനെ ബാധിച്ചിട്ടില്ലെന്ന് വൈറ്റ്ഹൗസും വ്യക്തമാക്കി.
റോക്കറ്റുകള്‍ തകര്‍ത്തതിനെ തുടര്‍ന്നുണ്ടായ പുകപടലം കാബൂള്‍ വിമാനത്താവളത്തില്‍ നിറഞ്ഞുനില്‍ക്കുന്നത് ഇന്നലെ പുറത്തുവന്ന ദൃശ്യങ്ങളില്‍ വ്യക്തമായിരുന്നു.