ദുബയ്: ലോകകപ്പ് ഫുട്‌ബോള്‍ മാമാങ്കത്തിന് അഞ്ചു നാള്‍ ശേഷിക്കെ ടീമുകളുടെ സന്നാഹ മല്‍സരങ്ങള്‍ ഇന്ന് ആരംഭിക്കും. ഇന്ന് ആദ്യ മല്‍സരത്തില്‍ ആഫ്രിക്കന്‍ നാഷന്‍സ് കപ്പ് ജേതാക്കളായ സെനഗല്‍ കസാക്കിസ്താനെ നേരിടും. യു.എ.ഇയിലാണ് മല്‍സരം.

ലോകകപ്പിലെ ആരാധകരുടെ ഇഷ്ടടീമുകളിലൊന്നായ അര്‍ജന്റീന നാളെ കളത്തിലിറങ്ങും. യു.എ.ഇയിലെ മുഹമ്മദ് ബിന്‍ സായിദ് സ്റ്റേഡിയത്തില്‍ ആതിഥേയരുമായാണ് ലയണല്‍ മെസ്സിയുടെ സംഘം മല്‍സരിക്കുന്നത്. ലോകകപ്പിലെ 32 ടീമുകളില്‍ 20 ടീമുകള്‍ക്കും പരിശീലന മല്‍സരങ്ങളുണ്ട്. ക്രിസ്റ്റ്യാനോ റൊണാള്‍ഡോയുടെ പോര്‍ച്ചുഗലും അര്‍ജന്റീനയെ പോലെ സന്നാഹ മല്‍സരത്തിനു ശേഷമാണ് ഖത്തറിലെത്തുക. ബ്രസീല്‍, ഇംഗ്ലണ്ട്, ഇറാന്‍, വെയ്ല്‍സ് തുടങ്ങിയ ടീമുകള്‍ക്ക് പരിശീലന മല്‍സരങ്ങളില്ല.

നാളെ അഞ്ച് മല്‍സരങ്ങളാണുള്ളത്. ജര്‍മനി ഒമാനിലെ സുല്‍ത്താന്‍ ഖാബൂസ് സ്റ്റേഡിയത്തില്‍ ഒമാനുമായി മാറ്റുരയ്ക്കും. ദോഹയില്‍ ഇറാന്‍ തുണീഷ്യയെയും റിയാദില്‍ സഊദി അറേബ്യ ക്രൊയേഷ്യയേയും വാര്‍സോയില്‍ പോളണ്ട് ചിലിയെയും നേരിടും. 17ാം തിയതി വ്യാഴാഴ്ച ആറ് മല്‍സരങ്ങളും 18ാം തിയതി വെള്ളിയാഴ്ച നാല് മല്‍സരങ്ങളുമാണുള്ളത്. 20ന് ഞായറാഴ്ചയാണ് ലോകകപ്പ് ഉദ്ഘാടന മല്‍സരം.