ദോഹ: സെനഗലിന്റെ ലോകകപ്പ് പ്രതീക്ഷകള്‍ മുഴുവന്‍ കാലുകളില്‍ ആവാഹിച്ചെത്തിയ സൂപ്പര്‍ താരം സാദിയോ മാനെ ലോകകപ്പിലെ ആദ്യ മല്‍സരത്തില്‍ കളിക്കില്ല. കാലിനേറ്റ പരിക്ക് ഭേദമാവാത്തതിനാല്‍ നിര്‍ണായകമായ ആദ്യ ഗ്രൂപ്പ് മല്‍സരത്തില്‍ നെതര്‍ലന്‍ഡ്‌സിനെതിരേ മാനെ കളിക്കില്ലെന്ന് കോച്ച് അലിയുസിസെ അറിയിച്ചു.

ഗ്രൂപ്പിലെ തുടര്‍ന്നുള്ള മല്‍സരങ്ങളില്‍ കളിക്കുന്ന കാര്യവും അനിശ്ചിതത്വത്തിലാണ്. ടീം നോക്കൗട്ട് റൗണ്ടിലെത്തിയില്ലെങ്കില്‍ മാനെക്ക് ഈ ലോകകപ്പില്‍ പന്തുതട്ടാനാവില്ലെന്നും റിപ്പോര്‍ട്ടുകളുണ്ട്. പരിക്കിന്റെ പിടിയിലാണെങ്കിലും ഈ ലോകകപ്പിലെ ഏറ്റവും ശ്രദ്ധേയ താരങ്ങളില്‍ ഒരാളായ മാനെയെ കോച്ച് കൈവിട്ടിരുന്നില്ല. അവസാന നിമിഷമാണ് മാനെയുടെ സാന്നിധ്യം കോച്ച് ഉറപ്പാക്കിയത്.

ശസ്ത്രക്രിയ ആവശ്യമില്ലെങ്കിലും വിശ്രമം വേണമെന്ന് ഡോക്ടര്‍മാര്‍ നിര്‍ദേശിച്ചതോടെ ഗ്രൂപ്പ് തലത്തിലെ മൂന്ന് മല്‍സരങ്ങള്‍ മാനെക്ക് നഷ്ടമാവുമെന്ന ആശങ്കയിലാണ് സെനഗല്‍. ഗ്രൂപ്പ് തലത്തില്‍ നെതര്‍ലന്‍ഡസിനെതിരായ ആദ്യ മല്‍സരം സെനഗലിന് നിര്‍ണായകമാണ്. യൂറോപ്യന്‍ കരുത്തുമായെത്തുന്ന അവര്‍ ലോക റാങ്കിങിലും ഏറെ മുന്നിലാണ്. ഖത്തറും ഇക്വഡോറുമാണ് ഗ്രൂപ്പിലെ മറ്റ് ടീമുകള്‍. രണ്ട് ടീമുകള്‍ക്കാണ് ഗ്രൂപ്പില്‍ നിന്ന് പ്രീ ക്വാര്‍ട്ടറിലേക്ക് പ്രവേശനം.