കൊച്ചി: കേരള ബ്ലാസ്റ്റേഴ്‌സ് മിഡ്ഫീൽഡർ ഉക്രെയ്‌നിയൻ താരം ഇവാൻ കലിയൂഷ്‌നിയുടെ കാൽപാദത്തിൽ ചുംബിച്ച് എയറിലായി പ്രമുഖ കമന്റേറ്റർ ഷൈജു ദാമോദരൻ. 'ഇത് കേരളത്തിന്റെ മുഴുവൻ ഉമ്മയാണ്' എന്ന് പറഞ്ഞുകൊണ്ടായിരുന്നു ഷൈജു, കലിയൂഷ്‌നിയുടെ കാൽപാദത്തിൽ ചുംബിച്ചത്. ഷൈജുവിന്റെ ഈ പരാമർശമാണ് വിവാദത്തിനിടയാക്കിയത്.

അഭിമുഖത്തിനിടെ താരത്തിന്റെ ഇടതുകൽ തന്റെ മടിയിൽ വയ്ക്കാൻ ഷൈജു ആവശ്യപ്പെടുകയും താരം അങ്ങിനെ ചെയ്തതോടെ കാലിൽ ചുംബിക്കുകയുമായിരുന്നു. ഇത് ഞാൻ തരുന്നതല്ല, കേരളത്തിലെ മുഴുവൻ ആരാധകരും തരുന്നതാണെന്നും ഈ സമയം ഷൈജു പറഞ്ഞു. അങ്ങിനെ ചെയ്യരുതെന്ന് പറഞ്ഞ് കലിയൂഷ്‌നി കാലുവലിക്കാൻ ശ്രമിച്ചെങ്കിലും ഷൈജു ചുംബിച്ചു.

ഷൈജു തന്റെ യുട്യൂബ് ചാനലിലാണ് അഭിമുഖം പ്രസിദ്ധീകരിച്ചത്. കഴിഞ്ഞ മത്സരത്തിൽ കലിയൂഷ്‌നിയെ എ.കെ 47 തോക്കുമായി താരതമ്യം ചെയ്തതിന്റെ ചരിത്രം അദ്ദേഹം വിവരിച്ചുനൽകുന്നുണ്ട്. ഇതിനൊടുവിലായിരുന്നു ചുംബനം.

കേരളത്തിലെ മുഴുവൻ ആരാധകരുടേതാണെന്നും പറഞ്ഞ് താരത്തിന്റെ കാലിൽ ചുംബിച്ച നടപടിക്കെതിരേ സമൂഹമാധ്യമങ്ങളിൽ ട്രോളുകൾ കൊണ്ട് നിറയുകുയംചെയ്തു.

ഷൈജുവിന്റെത് അതിരുകടന്ന താരാരാധനയായിപ്പോയെന്നാണ് ചൂണ്ടിക്കാണിക്കപ്പെടുന്നത്. താരത്തിന്റെ കാൽപാദത്തിൽ ചുംബിക്കണമെങ്കിൽ അത് സ്വന്തം പേരിൽ ചെയ്താൽ മതിയെന്നും കേരളത്തിന്റെ മൊത്തം ചലവിൽ വേണ്ടിയുരുന്നില്ലെന്നുമാണ് ഇക്കാര്യത്തിൽ സമൂഹമാധ്യമങ്ങളിൽ ഉയർന്ന വിമർശനം.

കഴിഞ്ഞ മത്സരത്തിൽ കലിയൂഷ്‌നിയുടെ ബുള്ളറ്റ് ഗോൾ വലിയ ചർച്ചയായിരുന്നു. ഈ സീസണിൽ നാല് ഗോളുമായി ഗോൾവേട്ടക്കാരുടെ പട്ടികയിൽ ഒന്നാമതാണ് താരം.

Shaiju Damodaran brutally trolled over kissing Ivan Kaliuzhnyi feet