ഇസ്‌റാഈലിനെ ഭൂപടത്തില്‍നിന്ന് മായ്ച്ച് ചൈനീസ് ഓണ്‍ലൈന്‍ മാപ്പുകള്‍

ബെയ്ജിങ്: ഇസ്‌റാഈല്‍ ഗസ്സയില്‍ ആക്രമണം ശക്തിപ്പെടുത്തിയതിനു പിന്നാലെ ചൈനീസ് ഓണ്‍ലൈന്‍ മാപ്പുകളില്‍നിന്ന് ഇസ്‌റാഈല്‍ പുറത്ത്. ലോകത്തെ ചെറു രാജ്യങ്ങളുടെ പേരുപോലും മാപ്പില്‍ ഇടംപിടിച്ചെങ്കിലും ഇസ്‌റാഈലിന്റെ പേര് ഓണ്‍ലൈന്‍ പ്ലാറ്റ്‌ഫോമുകള്‍ നീക്കം ചെയ്തു.

ചൈനീസ് സെര്‍ച്ച് എന്‍ജിനായ 'ബയ്ഡു', 'ആലിബാബ' എന്നിവയുടെ മാപ്പില്‍ നിന്നാണ് ഇസ്‌റാഈലിനെ വെട്ടിയത്. എന്നാല്‍ അന്താരാഷ്ട്ര സമൂഹം അംഗീകരിച്ച ഇസ്‌റാഈലിന്റെ രാജ്യാതിര്‍ത്തികള്‍ മാപ്പിലുണ്ടെങ്കിലും രാജ്യത്തിന്റെ പേര് ഒഴിവാക്കി. അതേസമയം ലക്‌സംബര്‍ഗ് പോലുള്ള ചെറുരാജ്യങ്ങളുടെ പേര് ആലിബാബയുടെ മാപ്പില്‍ ചേര്‍ത്തിട്ടുണ്ട്.

ഇസ്‌റാഈലിന് യു.എന്‍ പിന്തുണ നല്‍കി രംഗത്തുവന്നതോടെ റഷ്യയും ചൈനയും ഫലസ്തീന്‍ അനുകൂല നിലപാടാണ് സ്വീകരിക്കുന്നത്. ഇന്നലെ മുതലാണ് ചൈനീസ് യൂസര്‍മാര്‍ക്ക് ഇസ്‌റാഈലില്ലാത്ത മാപ്പ് ശ്രദ്ധയില്‍പ്പെട്ടത്. ഇസ്‌റാഈലിന്റെ പേര് മാപ്പില്‍ ഒഴിവാക്കാനുള്ള കാരണം ബെയ്ഡുവോ, ആലിബാബയോ വ്യക്തമാക്കിയിട്ടില്ല.

ഫലസ്തീനില്‍ അടിയന്തരമായി വെടിനിര്‍ത്തല്‍ നടപ്പാക്കണമെന്നാണ് ചൈനയുള്‍പ്പെടെയുള്ള രാജ്യങ്ങളുടെ നിലപാട്. എന്നാല്‍ ഇക്കാര്യം കഴിഞ്ഞദിവസം ഇസ്‌റാഈല്‍ പ്രധാനമന്ത്രി ബെന്യാമിന്‍ നെതന്യാഹു തള്ളിയിരുന്നു.