അസമയത്തെ വെടിക്കെട്ട് നിരോധന ഉത്തരവ് ഭാഗികമായി റദ്ദാക്കി: വിഷത്തില്‍ സര്‍ക്കാരിന് തീരുമാനമെടുക്കാമെന്ന് കോടതി

കൊച്ചി: അസമയത്തെ വെടിക്കെട്ട് നിരോധിച്ച സിംഗിള്‍ ബെഞ്ചിന്റെ ഉത്തരവ് ഹൈക്കോടതി ഡിവിഷന്‍ ബെഞ്ച് ഭാഗികമായി റദ്ദാക്കി. സമയക്രമം സംബന്ധിച്ച് അതാത് ക്ഷേത്രങ്ങളുടെ സാഹചര്യം നോക്കി സര്‍ക്കാരിന് തീരുമാനമെടുക്കാമെന്ന് ഡിവിഷന്‍ ബെഞ്ച് വ്യക്തമാക്കി. വിഷയത്തില്‍ സുപ്രീം കോടതി ഉത്തരവ് അനുസരിച്ചായിരിക്കണം തീരുമാനമെടുക്കേണ്ടതെന്നും ബെഞ്ച് വിധിയില്‍ പറഞ്ഞു.

അതേസമയം ക്ഷേത്രങ്ങള്‍ റെയ്ഡ് ചെയ്ത് വെടിക്കോപ്പുകള്‍ പിടിച്ചെടുക്കാനുള്ള നിര്‍ദേശം ഡിവിഷന്‍ ബെഞ്ച് പൂര്‍ണ്ണമായും റദ്ദാക്കി. സിംഗിള്‍ ബെഞ്ച് വിധിക്കെതിരെ സര്‍ക്കാര്‍ സമര്‍പ്പിച്ച അപ്പീലിലാണ് നടപടി. മാത്രമല്ല സിംഗിള്‍ ബെഞ്ചിന് മുന്നില്‍ എല്ലാ കക്ഷികളും എതിര്‍ സത്യവാങ്മൂലം സമര്‍പ്പിക്കണമെന്നും ബെഞ്ച് നിയമാനുസൃതം കേസുകള്‍ തീര്‍പ്പാക്കണമെന്നും ഡിവിഷന്‍ ബെഞ്ച് നിര്‍ദേശിച്ചു.

നേരത്തെ സിംഗിള്‍ ബെഞ്ച് പുറപ്പെടുവിച്ച വിധിയില്‍ അസമയം ഏതാണെന്ന് വ്യക്തമാക്കിയിരുന്നില്ലെന്നും ഇത് കോടതി വിധി വ്യക്തികള്‍ ഇഷ്ടത്തിന് വ്യാഖ്യാനിക്കാന്‍ ഇടവരുത്തുമെന്നുമായിരുന്നു സര്‍ക്കാര്‍ അപ്പീലില്‍ പറഞ്ഞിരുന്നത്. ആയതിനാല്‍ വിധി റദ്ദാക്കണമെന്നായിരുന്നു സര്‍ക്കാരിന്റെ വാദം. ഏതെങ്കിലും ക്ഷേത്രത്തില്‍ വെടിക്കോപ്പുകള്‍ അനധികൃതമായി സൂക്ഷിച്ചിരിക്കുന്നുവെന്ന് ഹരജിക്കാരന്‍ നല്‍കിയ പരാതിയിലില്ലെന്നും പരിഗണനാ വിഷയത്തിന് മുകളിലുള്ള കാര്യമാണ് കോടതി പരിശോധിച്ചതെന്നുമായിരുന്നു സര്‍ക്കാരിന്റെ വാദം.

ക്ഷേത്രോത്സവത്തിനുള്ള വെടിക്കെട്ടിന് ഇളവ് നല്‍കി 2005 ല്‍ സുപ്രീംകോടതി ഇളവ് നല്‍കിയിട്ടുണ്ട്.2006 ല്‍ ഇതില്‍ വ്യക്തത വരുത്തി വീണ്ടും ഉത്തരവിറക്കിയിട്ടുണ്ട്. തൃശ്ശൂര്‍ പൂരത്തിനും ആറാട്ട് പുഴ പൂരത്തിനും വെടിക്കെട്ട് നടത്താന്‍ സുപ്രീം കോടതി അനുമതി നല്‍കിയിട്ടുണ്ട്. ഹര്‍ജിയിലെ ആവശ്യങ്ങളേക്കാള്‍ കേരളത്തിലാകമാനം ബാധകമാകുന്ന ഉത്തരവിടാന്‍ കോടതിക്ക് കഴിയില്ലെന്നും സര്‍ക്കാര്‍ ചൂണ്ടിക്കാട്ടി. ഇതെല്ലാം പരിഗണിച്ചാണ് കോടതി ഉത്തരവ് ഭാഗികമായി റദ്ദാക്കിയത്.