ദോഹ: ഖത്തര്‍ ലോകകപ്പിലെ ആദ്യ ക്വാര്‍ട്ടര്‍ ഫൈനലില്‍ ബ്രസീല്‍ ക്രൊയേഷ്യയെ നേരിടാനൊരുങ്ങുന്നത് ടീമില്‍ മാറ്റങ്ങള്‍വരുത്താതെ. കൊറിയയെ നാലുഗോളുകള്‍ക്ക് തകര്‍ത്ത ആത്മവിശ്വാസത്തോടെയാണ് ടിറ്റെയും പടയാളികളും ഇന്ന് കളിക്കളം നിറയാനൊരുങ്ങുന്നത്.

ദക്ഷിണ കൊറിയയെ തകര്‍ത്ത് ലാറ്റിനമേരിക്കന്‍ കരുത്തിന്റെ മുഴുവന്‍ സൗന്ദ്യര്യവും പുറത്തെടുത്താണ് ബ്രസീല്‍ ക്വാര്‍ട്ടറിലെത്തിയത്. ഗ്രൂപ്പ് ഘട്ടത്തില്‍ ഗോളടി മറന്നെന്ന ആക്ഷേപത്തിന് നോക്കൗട്ടില്‍ ആദ്യ പകുതിയില്‍ തന്നെ നാല് ഗോളടിച്ച് ആഘോഷിച്ചു ബ്രസീല്‍.

ടൂര്‍ണമെന്റില്‍ ആദ്യമായാണ് ബ്രസീല്‍ ആദ്യ പകുതിയില്‍ ഗോള്‍ നേടുന്നത്. സൂപ്പര്‍ താരം നെയ്മര്‍ക്കൊപ്പം കിരീടത്തിനായി തകര്‍ത്തുകളിക്കുന്ന യുവനിരയാണ് ബ്രസീലിന്റെ കരുത്ത്. ഒപ്പം പരിശീലകന്‍ ടിറ്റെയുടെ തന്ത്രങ്ങളും കൂടി ചേരുന്നതോടെ ബ്രസീല്‍ എല്ലാവരേയും ഭയപ്പെടുത്തുന്ന ടീമായി മാറുന്നു. അല്‍ റയ്യാന്‍ എജ്യുക്കേഷന്‍ സിറ്റി സ്റ്റേഡിയത്തില്‍ ഇന്ത്യന്‍ സമയം രാത്രി 8.30നാണ് കിക്കോഫ്.