ന്യുഡല്‍ഹി: 'തന്റെ വാക്കുകള്‍ കുറിച്ച് വെച്ചോളൂ, ബി.ജെ.പിയെ അധികാരത്തില്‍ നിന്ന് താഴെ ഇറക്കിയിരിക്കും' ഭാരത് ജോഡോ യാത്രയുടെ ഭാഗമായി രാജസ്ഥാനില്‍ നടത്തിയ വാര്‍ത്താ സമ്മേളനത്തില്‍ രാഹുല്‍ ഗാന്ധി.

കോണ്‍ഗ്രസ് ഏകാധിപതികളുടെ പാര്‍ട്ടിയല്ല. കോണ്‍ഗ്രസിനെ വിലകുറച്ച് കാണരുത്. ബി.ജെ.പിയെ കോണ്‍ഗ്രസ് അധികാരത്തില്‍ നിന്ന് താഴെയിറക്കുമെന്നും രാഹുല്‍ ഗാന്ധി പറഞ്ഞു. ഭാരത് ജോഡോ യാത്ര ഹിന്ദി മേഖലകളില്‍ വിജയിക്കില്ലെന്ന് ചിലര്‍ പറഞ്ഞെങ്കിലും മഹാരാഷ്ട്രയിലും മധ്യപ്രദേശിലും ഇപ്പോള്‍ രാജസ്ഥാനിലും വന്‍ ജനക്കൂട്ടമാണ് യാത്രയെ സ്വീകരിച്ചിട്ടുള്ളത്.

കേരളത്തിലും കര്‍ണാടകത്തിലും ഭാരത് ജോഡോ യാത്ര മികച്ചതായി. ബിജെപിയുടെയും ആര്‍എസ്എസിന്റെയും ലക്ഷ്യം മറ്റുള്ളവരെ അപകീര്‍ത്തിപ്പെടുത്തുകയാണ്. ഇവരെ ഏറ്റവും കൂടുതല്‍ സഹായിച്ചത് മാധ്യമങ്ങളാണെന്നും അദ്ദേഹം പറഞ്ഞു.