മലപ്പുറം: സാമ്പത്തിക വര്‍ഷം ആദ്യപകുതിയെത്തിയിട്ടും തദ്ദേശ സ്ഥാപനങ്ങള്‍ ഇതുവരെ പിരിച്ചെടുത്തത് 10.39 ശതമാനം നികുതി. ആറു മാസത്തിനുള്ളില്‍ 50 ശതമാനം നികുതി പിരിച്ചെടുക്കണമെന്നാണ് കണക്ക്. നികുതി വരുമാനം കുറഞ്ഞതോടെ പദ്ധതിപ്രവൃത്തികളും താളം തെറ്റുകയാണ്.

ഈ സാമ്പത്തിക വര്‍ഷം 1533.57 കോടി രൂപയാണ് തദ്ദേശ സ്ഥാപനങ്ങള്‍ നികുതി ഇനത്തില്‍ പിരിച്ചെടുക്കേണ്ടത്. ഇതില്‍ 159.46 കോടി മാത്രമാണ് ഇതുവരെ പിരിച്ചെടുത്തത്. 1374.18 (89.61 ശതമാനം) കോടിയാണ് ഇനി പിരിച്ചെടുക്കാനുള്ളത്.
നഗരസഭകളും കോര്‍പ്പറേഷനുമാണ് നികുതി പിരിവില്‍ ഏറ്റവും പിറകില്‍. കോര്‍പറേഷനുകള്‍ 575.74 കോടി രൂപ നികുതി പിരിച്ചെടുക്കണം. ഇതില്‍ 48.38 കോടി (8.40 ശതമാനം)മാത്രമാണ് പിരിച്ചെടുത്തത്. 527.35 കോടി പിരിച്ചെടുക്കാനുണ്ട്.
നഗരസഭകള്‍ 8.19 ശതമാനമാണ് നികുതി പിരിച്ചത്. 593.23 കോടിയില്‍ ഇതുവരെ വരുമാനമായി എത്തിയത് 48.53 കോടിയാണ്. 544.69 കോടിയും അടുത്ത മാര്‍ച്ചിനുള്ളില്‍ പിരിച്ചെടുക്കണം. ഗ്രാമപഞ്ചായത്തുകള്‍ 17.12 ശതമാനം നികുതി പിരിച്ചെടുത്തിട്ടുണ്ട്. 364.60 കോടിയില്‍ 62.55 കോടിയാണ് പിരിച്ചെടുത്തത്.

ഈ സാമ്പത്തിക വര്‍ഷം തദ്ദേശസ്ഥാപനങ്ങള്‍ 6306.64 കോടിയുടെ പദ്ധതികളാണ് പൂര്‍ത്തിയാക്കേണ്ടത്. എന്നാല്‍ ആറു മാസമായിട്ടും 799.70 കോടിയുടെ പ്രവൃത്തികളാണ് (12.68 ശതമാനം) ഇതുവരെ പൂര്‍ത്തിയാക്കിയത്.