ലഖ്‌നൗ: നിര്‍മാണത്തിലെ പിഴവ് കൊണ്ട് ശ്രദ്ധനേടി ഉത്തര്‍പ്രദേശിലെ പൊതുശൗചാലയം. ഒറ്റമുറിക്കുള്ളില്‍ രണ്ട് ക്ലോസറ്റ്‌. നടുവിലായി ഒരു ഭിത്തിപോലുമില്ലാതെയാണ് ക്ലോസറ്റുകള്‍ നിര്‍മിച്ചിരിക്കുന്നത്.

യു.പിയിലെ ബസ്തി ജില്ലയിലെ ഗൗര ധുന്‍ധ ഗ്രാമത്തിലെ ടോയ്‌ലറ്റ് കോംപ്ലക്‌സില്‍ നിന്നുള്ള ചിത്രങ്ങളാണ് സാമൂഹികമാധ്യമങ്ങളില്‍ വൈറലാകുന്നത്. സര്‍ക്കാറിന്റെ ഔദ്യോഗിക രേഖകളില്‍ 'ഇസ്സത് ഘര്‍' എന്നറിയപ്പെടുന്ന ഈ ടോയ്‌ലറ്റ് കോപ്ലംക്‌സ് നിര്‍മാണത്തിനായി 10 ലക്ഷം രൂപയാണ് ചിലവഴിച്ചത്. പലതിലും രണ്ട് ക്ലോസറ്റുകള്‍ മറയില്ലാതെയും പലതിനും വാതിലുകള്‍ സ്ഥാപിക്കാതെയുമാണ് നിര്‍മിച്ചിരിക്കുന്നത്.

അതേസമയം ചിത്രങ്ങള്‍ സാമൂഹ്യമാധ്യമങ്ങളില്‍ ചര്‍ച്ചയായതോടെ ബന്ധപ്പെട്ട ഉദ്യോഗസ്ഥരോട് വിശദീകരണം ആവശ്യപ്പെട്ട് ജില്ലാ ഭരണകൂടം രംഗത്തെത്തിയിട്ടുണ്ട്. കൃത്യവിലോപം നടത്തിയ ഉദ്യോഗസ്ഥര്‍ക്കെതിരെ അനുയോജ്യമായ നടപടി സ്വീകരിക്കുമെന്ന് ജില്ലാ മജിസ്‌ട്രേറ്റ് പ്രിയങ്ക നിരഞ്ജന്‍ പറഞ്ഞു.