വാഷിങ്ടണ്‍: പ്രധാനമന്ത്രി നരേന്ദ്രമോദിയുടെ സന്ദര്‍ശനത്തിനെതിരേ അമേരിക്കയില്‍ വന്‍ പ്രതിഷേധം. അമേരിക്കയിലെ ഇന്ത്യന്‍ വംശജരാണ് കഴിഞ്ഞ ദിവസം വൈറ്റ് ഹൗസിനു മുമ്പില്‍ മോദിക്കെതിരേ മുദ്രാവാക്യം മുഴക്കി പ്രതിഷേധിച്ചത്.

വൈറ്റ് ഹൗസിനു സമീപത്തെ പാര്‍ക്കിലായിരുന്നു പ്രതിഷേധം. ഗോ ബാക്ക് മോദി, ഫാസിസത്തില്‍നിന്ന് ഇന്ത്യയെ രക്ഷിക്കുക തുടങ്ങിയ മുദ്രാവാക്യങ്ങള്‍ എഴുതിയ ബാനര്‍ ഉയര്‍ത്തിയായായിരുന്നു പ്രതിഷേധം. ഇന്ത്യയില്‍ നടക്കുന്ന മനുഷ്യാവകാശ ലംഘനങ്ങള്‍, മതന്യൂനപക്ഷങ്ങള്‍ക്കെതിരായ വേട്ടയാടല്‍, വിവാദ കാര്‍ഷിക നിയമങ്ങള്‍, കശ്മിര്‍ പ്രശ്‌നം എന്നിവയും പ്രതിഷേധക്കാര്‍ ഉന്നയിച്ചു. അമേരിക്കന്‍ വിദേശകാര്യ നയത്തില്‍ മനുഷ്യാവകാശ സംരക്ഷണത്തിന് മുഖ്യപരിഗണനയുണ്ടാകുമെന്ന ജോ ബൈഡന്റെ തെരഞ്ഞെടുപ്പ് വാഗ്ദാനവും പ്രതിഷേധക്കാര്‍ ഓര്‍മിപ്പിച്ചു.