കിരണ്‍ പുരുഷോത്തമന്‍

കൊച്ചി: പാലാ ബിഷപ്പിന്റെ നാര്‍കോട്ടിക് ജിഹാദ് പ്രസ്താവനയെ തള്ളി ക്രൈസ്തവ സംഘടനകളും രംഗത്ത്. വര്‍ഗീയ പ്രചാരണം നടത്തിയ ബിഷപ്പ് മാര്‍ ജോസഫ് കല്ലറങ്ങാട്ട് പ്രസ്താവന തിരുത്തണമെന്ന് മുഖ്യമന്ത്രിയുള്‍പ്പെടെയുള്ളവര്‍ ആവശ്യപ്പെട്ടിട്ടും നിലപാടില്‍ മാറ്റം വരുത്താന്‍ തയാറാകാത്ത സാഹചര്യത്തിലാണ് കൂടുതല്‍ ക്രൈസ്തവ സംഘടനകള്‍ ബിഷപ്പിനെതിരേ പരസ്യമായി രംഗത്തുവന്നത്. ബിഷപ്പിനെ അനുകൂലിച്ച കേരള കത്തോലിക്ക മെത്രാന്‍ സമിതി (കെ.സി.ബി.സി) യുടെ നിലപാടിനെതിരേ ക്രൈസ്തവ സംഘടനകള്‍ പ്രതിഷേധവുമായി തെരുവിലും ഇറങ്ങി. ജോയിന്റ് ക്രിസ്ത്യന്‍ കൗണ്‍സിലിന്റെ നേതൃത്വത്തില്‍ വിശ്വാസികള്‍ കെ.സി.ബി.സി ആസ്ഥാനത്തിനുമുന്നില്‍ കഴിഞ്ഞ ദിവസം പ്രതിഷേധ ധര്‍ണ നടത്തി.
കേരളത്തിലെ ഒന്നൊഴികെ മറ്റെല്ലാ പാര്‍ട്ടികളും അനുചിതമായിപ്പോയെന്ന് വ്യക്തമാക്കിയ പ്രസ്താവന പിന്‍വലിക്കാന്‍ ബിഷപ്പ് തയാറാവണമെന്ന് എറണാകുളം അങ്കമാലി അതിരൂപത സംരക്ഷണ സമിതി ആവശ്യപ്പെട്ടു. 'നാര്‍കോട്ടിക് ജിഹാദി'ന് തെളിവുണ്ടെങ്കില്‍ ബന്ധപ്പെട്ടവര്‍ക്ക് കൈമാറണമെന്നും അല്ലാത്തപക്ഷം ബിഷപ്പ് പ്രസ്താവന പിന്‍വലിക്കണമെന്നും വിശ്വാസികളുടെ കൂട്ടായ്മയായ എ.എം.ടിയും ആവശ്യപ്പെട്ടു. വിശ്വാസി സമൂഹത്തിന്റെ പ്രതിഷേധം ശക്തമായതോടെ ആദ്യം പാലാ ബിഷപ്പിനൊപ്പം നിലകൊണ്ടിരുന്ന സിറോ മലബാര്‍ സഭ മേജര്‍ ആര്‍ച്ച് ബിഷപ്പ് കര്‍ദിനാള്‍ മാര്‍ ജോര്‍ജ് ആലഞ്ചേരിയും നിലപാട് മാറ്റിയിരുന്നു.

ലഹരി ജിഹാദ് പരാമര്‍ശത്തില്‍ കേരളത്തിലെ മുഴുവന്‍ മെത്രാന്മാരും അടിയന്തരമായി യോഗം ചേര്‍ന്ന് മെത്രാന്‍ സമിതിയുടെ ഔദ്യോഗിക നിലപാട് പൊതുസമൂഹത്തോട് വെളിപ്പെടുത്തണമെന്ന് ആവശ്യപ്പെട്ടാണ് ജോയിന്റ് ക്രിസ്ത്യന്‍ കൗണ്‍സില്‍ കെ.സി.ബി.സി ആസ്ഥാനത്തിന് മുമ്പില്‍ ധര്‍ണ നടത്തിയത്. നിലവിലെ മേജര്‍ ആര്‍ച്ച് ബിഷപ്പ് ഭൂമി കുംഭകോണത്തില്‍ പെട്ട് സ്ഥാനം രാജിവയ്ക്കാന്‍ നിര്‍ബന്ധിതനായിരിക്കുന്ന പശ്ചാത്തലത്തില്‍ പുതിയ മേജര്‍ ആര്‍ച്ച് ബിഷപ്പ് സ്ഥാനത്തിനായുള്ള മത്സരത്തില്‍ മേല്‍ക്കൈ നേടാനുള്ള ചങ്ങനാശ്ശേരി ലോബിയുടെ നിഗൂഢശ്രമമാണ് 'വര്‍ഗീയ' ആരോപണങ്ങള്‍ക്ക് പിന്നിലെന്ന് ജോയിന്റ് ക്രിസ്ത്യന്‍ കൗണ്‍സില്‍ പ്രസിഡന്റ് ഫെലിക്‌സ് ജെ. പുല്ലൂടന്‍ പറഞ്ഞു.
സ്വന്തം സ്വാര്‍ഥതയ്ക്കുവേണ്ടി സമുദായങ്ങളെ തമ്മിലടിപ്പിക്കുന്ന നിലപാടുകളുമായി മെത്രാന്മാര്‍ ഇനിയും മുന്നോട്ട് പോവുകയാണെങ്കില്‍ വിശ്വാസികള്‍ അവരെ തെരുവില്‍ തടയുന്ന കാലം വിദൂരമല്ലെന്നും കൗണ്‍സില്‍ മുന്നറിയിപ്പ് നല്‍കി.