തിരുവനന്തപുരം: സര്‍വേ നമ്പര്‍ ചേര്‍ത്ത പുതിയ ബഫര്‍ സോണ്‍ ഭൂപടം വനംവകുപ്പ് പ്രസിദ്ധീകരിച്ചു. ഭൂപടത്തില്‍ അവ്യക്തതയോ, പിഴവുകളോ കണ്ടെത്തുകയാണെങ്കില്‍ അടുത്ത മാസം ഏഴിനുള്ളില്‍ പരാതി നല്‍കാനുള്ള സൗകര്യവും ഏര്‍പ്പെടുത്തിയിട്ടുണ്ട്.

ഇന്നലെയാണ് കരട് ഭൂപടം പുറത്തിറക്കിയത്. ഇതില്‍ അപാകതകള്‍ ഉണ്ടെന്ന് വിദഗ്ധ സമിതി ചൂണ്ടിക്കാട്ടിയിരുന്നു. ഇതിന്റെ അടിസ്ഥാനത്തിലാണ് സര്‍വേ നമ്പര്‍ ചേര്‍ത്ത ബഫര്‍സോണ്‍ ഭൂപടം പ്രസിദ്ധീകരിച്ചത്.അതിനിടെ, വിദഗ്ധ സമിതിയുടെ കാലാവധി നീട്ടി. ഫെബ്രുവരി 28 വരെയാണ് നീട്ടിയത്. വിദഗ്ധ സമിതിയുടെ കാലാവധി നീട്ടാന്‍ സര്‍ക്കാര്‍ നേരത്തെ തന്നെ തീരുമാനിച്ചിരുന്നു. ബഫര്‍ സോണിന്റെ ആഘാതം പഠിച്ച് റിപ്പോര്‍ട്ട് സമര്‍പ്പിക്കുന്നതിനായാണ് വിദഗ്ധ സമിതിക്ക് രൂപം നല്‍കിയത്.

ബഫര്‍ സോണില്‍ ആശയ കുഴപ്പത്തിനും ആശങ്ക പരത്താനും ആരും മുതിരരുതെന്ന് മന്ത്രി എം.ബി രാജേഷ് പറഞ്ഞു. സര്‍ക്കാര്‍ പ്രവര്‍ത്തിക്കുന്നത് ജനങ്ങളുടെ താത്പര്യം സംരക്ഷിക്കാനാണ്. വകുപ്പുകളുടെ ഏകോപനത്തിന് യാതൊരു കുറവുമില്ലെന്നും അദ്ദേഹം കൂട്ടിച്ചേര്‍ത്തു.