കേരള വര്‍മ്മ കോളജ് യൂണിയന്‍ തെരഞ്ഞെടുപ്പ്; റീ കൗണ്ടിങ് ഇന്ന്

തൃശ്ശൂര്‍: കേരള വര്‍മ്മ കോളജ് യൂണിയന്‍ ചെയര്‍മാന്‍ സ്ഥാനത്തേക്കുള്ള റീ കൗണ്ടിങ് ഇന്ന്. രാവിലെ 9 മണിയോടെ പ്രിന്‍സിപ്പലിന്റെ ചേംബറില്‍ വെച്ചാണ് വോട്ടെണ്ണല്‍. തെരഞ്ഞെടുപ്പില്‍ കൃത്രിമത്വം നടന്നെന്ന് ചൂണ്ടിക്കാണിച്ച് കെ.എസ്.യു ചെയര്‍മാന്‍ സ്ഥാനാര്‍ഥി എസ്. ശ്രീകുട്ടന്‍ നല്‍കിയ ഹരജിയില്‍ ഹൈക്കോടതി വിധിയുടെ അടിസ്ഥാനത്തിലാണ് റീ കൗണ്ടിങ് നടക്കുന്നത്. വോട്ടെണ്ണല്‍ നടപടികള്‍ പൂര്‍ണ്ണമായും വീഡിയോയില്‍ പകര്‍ത്തും.

വീണ്ടും തെരഞ്ഞെടുപ്പ് നടത്തണമെന്നായിരുന്നു കെ.എസ്.യുവിന്റെ ആവശ്യം. ഹരജി പരിഗണിച്ച കോടതി, അസാധുവോട്ടുകളടക്കം കൂട്ടിച്ചേര്‍ത്ത് എണ്ണിയതില്‍ അപാകതയുണ്ടെന്ന് കണ്ടെത്തിയിരുന്നു.

നവംബര്‍ ഒന്നിനായിരുന്നു കോളജ് യൂണിയന്‍ തെരഞ്ഞെടുപ്പ്. ആദ്യം വോട്ടെണ്ണയപ്പോള്‍ ശ്രീക്കുട്ടന് 896 വോട്ടും, എസ്.എഫ്.ഐ സ്ഥാനാര്‍ഥി അനിരുദ്ധന്895 വോട്ടുമാണ് ലഭിച്ചത്. തുടര്‍ന്ന് എസ്.എഫ്.ഐ ആവശ്യപ്പെട്ടതിനെ തുടര്‍ന്ന് റീ കൗണ്ടിങ് നടത്തി അനിരുദ്ധന്‍ 11 വോട്ടിന് വിജയിച്ചതായി പ്രഖ്യാപിക്കുകയും ചെയ്തു. എന്നാല്‍ വോട്ടെണ്ണലില്‍ കൃത്രിമം നടത്തിയാണ് എസ്.എഫ്.ഐ സ്ഥാനാര്‍ഥി വിജയിച്ചതെന്നാണ് കെ.എസ്.യുവിന്റെ ആരോപണം. ഇക്കാര്യങ്ങള്‍ ചൂണ്ടിക്കാട്ടിയാണ് ശ്രീക്കുട്ടന്‍ ഹരജി നല്‍കിയത്.