വടക്കാഞ്ചേരി: ആകാശവാണിയുടെ വയലും വീടും പരിപാടി സംപ്രേഷണത്തിന്റെ അര നൂറ്റാണ്ടിന്റെ നിറവില്‍. റേഡിയോ ഒരു തരംഗമായി നിലനിന്നിരുന്ന കാലഘട്ടത്തില്‍ കേരളത്തിലെ സ്വീകരണ മുറികളില്‍ നിന്ന് ഉയര്‍ന്ന് കേട്ടിരുന്ന പരിപാടിയാണ് വയലും വീടും.
രാജ്യത്തിന്റെ ഭക്ഷ്യ സുരക്ഷക്കായി ആകാശവാണി ഏറ്റെടുത്ത് വിജയകരമായി പൂര്‍ത്തിയാക്കിയ വിജ്ഞാന വ്യാപന ദൗത്യം മാധ്യമ ചരിത്രത്തില്‍ തന്നെ ഇടം പിടിച്ച ശ്രദ്ധേയമായ പരിപാടിയായിരുന്നു. പ്രക്ഷേപണത്തിന്റെ അമ്പതാം വാര്‍ഷികാഘോഷങ്ങളുടെ ഭാഗമായി ആകാശവാണി നിലയങ്ങളുടെ നേതൃത്വത്തില്‍ വിപുലമായ പരിപാടികളാണ് ആസൂത്രണം ചെയ്തിട്ടുള്ളത്.
എല്ലാ ജില്ലകളിലും കാര്‍ഷിക പ്രശ്‌നോത്തരിയും സംഘടിപ്പിച്ചിട്ടുണ്ട്. ജില്ലാ തല മത്സരങ്ങളില്‍ ഒന്നാം സ്ഥാനം നേടുന്ന ടീമുകളെ ഉള്‍പ്പെടുത്തി സംസ്ഥാന തല മത്സരം നടത്തും. തൃശൂര്‍ ജില്ലാ തല മത്സരം വടക്കാഞ്ചേരി നഗരസഭാ അതിര്‍ത്തിയില്‍ വച്ചാണ് നടക്കുക. ഓഗസ്റ്റ് 30ന് രാവിലെ 10.30 മുതല്‍ അത്താണി പെരിങ്ങണ്ടൂര്‍ സര്‍വിസ് സഹകരണ ബാങ്ക് ഹാളില്‍ വച്ചാണ് മത്സരം.
ജില്ലയിലെ ഓരോ കൃഷി അസിസ്റ്റന്റ് ഡയറക്ടര്‍ ഓഫിസ് പരിധിയിലുള്ള രണ്ട് കര്‍ഷകര്‍ വീതമുള്ള ടീമാണ് മത്സരത്തില്‍ പങ്കെടുക്കുക. തുടര്‍ന്ന് കര്‍ഷക സംഗമവും, മുഖാമുഖവും നടക്കും. ആറങ്ങോട്ടുകര വയലി നാട്ടറിവ് പഠന കേന്ദ്രത്തിന്റെ നാടന്‍ പാട്ടുകളും ഉണ്ടാകും.