വീണ്ടും മാതൃകയായി യുഎഇ; സന്നദ്ധ പ്രവർത്തകർ ഒറ്റദിനം ശേഖരിച്ചത്​ 10.5 ടൺ മാലിന്യം

ദുബൈ: ലോക കാലാവസ്ഥാ ഉച്ചകോടിക്ക് പിന്നാലെ കൂടുതൽ ശുദ്ധിയായി യുഎഇ. എമിറേറ്റ്​ എൻവയൺമെന്‍റൽ ഗ്രൂപ്പ്​ (ഇ.ഇ.ജി) രാജ്യത്തുടനീളം നടത്തിയ ശുദ്ധീകരണത്തോടെയാണ് യുഎഇയിലെ മാലിന്യമുക്തമാകുന്നത്. ‘ക്ലീൻ യുഎഇ’ ക്യാമ്പയിനിന്റെ ഭാഗമായി നടത്തിയ ശുചീകരണ പ്രവർത്തനത്തിൽ ഒറ്റദിനം ശേഖരിച്ചത്​ 10.5 ടൺ മാലിന്യമാണ്. 7,327 സന്നദ്ധ പ്രവർത്തകരാണ് പ്രവർത്തി സംരക്ഷണത്തിന്റെ ഭാഗമായത്.

യുഎഇ പരിസ്ഥിതി, കാലാവസ്ഥ വ്യതിയാന മന്ത്രാലയത്തിന്‍റെ കീഴിൽ നടക്കുന്ന ‘ക്ലീൻ യുഎഇ’​ ക്യാമ്പയിനിന്റെ 22ാം എഡിഷനാണ്​ ശനിയാഴ്ച സംഘടിപ്പിച്ചത്​. ദുബൈ മുനിസിപ്പാലിറ്റി, സൈഹ്​ അൽ സലാം സംരക്ഷണ മേഖല മാനേജ്​മെന്‍റ്​, ദുബൈ ഇക്കണോമിക്​ ആൻഡ്​ ടൂറിസം എന്നിവയുടെ സഹകരണത്തോടെയാണ് പരിപാടി നടന്നത്.

രാജ്യത്തെ ഏഴ് എമിറേറ്റുകളിലായാണ് ശുചിത്വ ക്യാമ്പയിൻ സംഘടിപ്പിച്ചത്. സ്വദേശികളും വിദേശികളും ഉൾപ്പെടെയുള്ള വളന്‍റിയർമാരാണ് ശുചീകരണത്തിന് ചുക്കാൻ പിടിച്ചത്. വളന്‍റിയർമാർക്കായി പ്രത്യേക ടീഷർട്ടുകളും തൊപ്പിയും സമ്മാനിച്ചിരുന്നു.​ കൂടാതെ പുനരുപയോഗിക്കാവുന്ന കോട്ടൺ കൈയുറകളും ജൈവ വിഘടന സാധ്യമാകുന്ന പ്ലാസ്റ്റിക്​ ബാഗുകളും ഒരുക്കിയിരുന്നു.