തിരുവനന്തപുരം: നീണ്ടു ഇടവേളക്കു ശേഷം സംസ്ഥാനത്തെ തിയറ്ററുകളില്‍ ഇന്ന് മുതല്‍ സിനിമാ പ്രദര്‍ശനം ആരംഭിക്കും. ജയിംസ് ബോണ്ട് ചിത്രം നോ ടൈം ടു ഡൈയാണ് ആദ്യ റിലീസ്. ഇംഗ്ലീഷ് ചിത്രം വെനം 2 വും ഇന്ന് പ്രദര്‍ശനത്തിനെത്തും.

ആറ് മാസത്തിന് ശേഷമാണ് തിയറ്ററുകള്‍ പ്രവര്‍ത്തനം ആരംഭിക്കുന്നത്. 50 ശതമാനം സീറ്റുകളില്‍ മാത്രമാണ് പ്രവേശനം. ജീവനക്കാരും സിനിമ കാണാനെത്തുന്നവരും രണ്ട് ഡോസ് വാക്‌സിന്‍ എടുത്തിരിക്കണം.

വെള്ളിയാഴ്ച മുതല്‍ മലയാള സിനിമകള്‍ തിയറ്ററുകളിലെത്തുമെന്നായിരുന്നു പ്രതീക്ഷിച്ചിരുന്നതെങ്കിലും റിലീസുകള്‍ വൈകാനാണ് സാധ്യത. മറ്റന്നാള്‍ റിലീസ് ചെയ്യുന്ന സ്റ്റാറാണ് ആദ്യം പ്രദര്‍ശനത്തിന് എത്തുന്ന മലയാള ചിത്രം. നവംബര്‍ 12ന് ദുല്‍ഖര്‍ സല്‍മാന്‍ നായകനാകുന്ന കുറുപ്പ് റിലീസ് ചെയ്യും.

അതേസമയം, മുഴുവന്‍ സീറ്റുകളിലും കാണികളെ അനുവദിക്കുന്നതടക്കം തീയേറ്റര്‍ ഉടമകള്‍ മുന്നോട്ട് വച്ച ആവശ്യങ്ങള്‍ ചര്‍ച്ച ചെയ്യാന്‍ യോഗംചേരാന്‍ സര്‍ക്കാര്‍ തീരുമാനമെടുത്തിട്ടുണ്ട്.
സര്‍ക്കാര്‍ കൂടുതല്‍ ഇളവുകള്‍ നല്‍കുന്ന മുറക്ക് മാത്രം റിലീസിങ് മതിയെന്നാണ് ഭൂരിഭാഗം നിര്‍മാതാക്കളുടെയും വിതരണക്കാരുടെയും അഭിപ്രായം.