കൊല്ലം: വിദ്യാര്‍ഥിയെ മര്‍ദ്ദിക്കുകയും ശ്വാസം മുട്ടിച്ച് കൊല്ലാന്‍ ശ്രമിക്കുകയും ചെയ്‌തെന്ന കേസില്‍ ഒളിവിലായിരുന്ന പ്രതി പിടിയില്‍.  ചിതറ ബൗണ്ടര്‍മുക്കില്‍ താമസിക്കുന്ന കൊട്ടിയം ഷിജു (48) ആണ് അറസ്റ്റിലായത്. മറ്റൊരു പ്രതി ഷിബുവിനെ നേരത്തെ അറസ്റ്റ് ചെയ്തിരുന്നു. തന്നെ തിരിച്ചറിഞ്ഞില്ല എന്ന കാരണം പറഞ്ഞാണ് ഇയാള്‍ വിദ്യാര്‍ഥിയെ ശ്വാസം മുട്ടിച്ച് കൊല്ലാന്‍ നോക്കിയത്.

ഏപ്രില്‍ 17നായിരുന്നു സംഭവം. മൂന്നുമുക്ക് സജീര്‍ മന്‍സിലില്‍ മുസമ്മലിന് (18) ആണ് മര്‍ദ്ദനമേറ്റത്. കൊല്ലത്ത് കോച്ചിങ് ക്ലാസിനു പോയ മുസമ്മല്‍ സ്വകാര്യ ബസില്‍ വീട്ടിലേക്ക് വരുമ്പോഴാണ് മര്‍ദ്ദനമേറ്റത്. ബൗണ്ടര്‍മുക്കില്‍ വച്ച് ബസ് ബ്രേക്ക് ഡൗണായി. വിദ്യാര്‍ഥികള്‍ ഉള്‍പ്പെടെയുള്ള യാത്രക്കാര്‍ റോഡില്‍ ഇറങ്ങി നിന്നു.

ഈ സമയത്ത് സ്‌കൂട്ടറില്‍ അതുവഴിയെത്തിയ ഷിജു എല്ലാവരോടും മാറി നില്‍ക്കാന്‍ ആവശ്യപ്പെട്ടു. അതിനിടെയാണ് ഇയാള്‍ മുസമ്മലിനോടു കയര്‍ത്തത്. നിനക്ക് മാറാന്‍ ബുദ്ധിമുട്ടുണ്ടോടാ, ഗുണ്ട കൊട്ടിയം ഷിജുവിനെ അറിയില്ലേ എന്നും ചോദിച്ചായിരുന്നു മര്‍ദ്ദനം.

തലയ്ക്കും ശരീരമാസകലവും പരുക്കേറ്റ് അവശനിലയിലായ മുസമ്മിലിനെ നാട്ടുകാര്‍ കടയ്ക്കല്‍ താലൂക്ക് ആശുപത്രിയിലും തുടര്‍ന്ന് തിരുവനന്തപുരം മെഡിക്കല്‍ കോളജ് ആശുപത്രിയിലും പ്രവേശിപ്പിച്ചു. 

ഒട്ടേറെ കേസുകളില്‍ പ്രതിയാണ് ഇയാളെന്ന് പൊലിസ് പറഞ്ഞു. കടക്കല്‍ ജുഡീഷ്യല്‍ ഫസ്റ്റ് ക്ലാസ് മജിസ്‌ട്രേറ്റ് കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.