അമ്മാന്‍/ ലോസ് ആഞ്ചലസ്: ജോര്‍ദാനിലും സിറിയയിലും യു.എസിലെ ലോസാഞ്ചലസിലും ഭൂചലനം. ജോര്‍ദാന്‍ -സിറിയ മേഖലയില്‍ റിക്ടര്‍ സ്‌കെയിലില്‍ 4.8 തീവ്രത രേഖപ്പെടുത്തിയ ഭൂചലനമാണ് ഉണ്ടായതെന്ന് ജര്‍മ്മന്‍ റിസര്‍ച്ച് സെന്റര്‍ ഫോര്‍ ജിയോസയന്‍സസ് വ്യക്തമാക്കി. സിറിയന്‍ നഗരമായ ഹമയ്ക്ക് സമീപം ഭൂകമ്പത്തിന്റെ പ്രഭവകേന്ദ്രം രേഖപ്പെടുത്തിയതായി സിറിയയുടെ സ്റ്റേറ്റ് ന്യൂസ് ഏജന്‍സി അറിയിച്ചു. 

സിറിയയിലുടനീളമുള്ള ജനങ്ങള്‍ക്ക് ഭൂചലനം അനുഭവപ്പെട്ടുവെങ്കിലും നാശനഷ്ടങ്ങളോ ആളപായമോ റിപ്പോര്‍ട്ട് ചെയ്യപ്പെട്ടിട്ടില്ല. അതേസമയം, ലെബനനിലും പ്രകമ്പനം അനുഭവപ്പെട്ടതായി റിപ്പോര്‍ട്ടുകളുണ്ട്. 

കാലിഫോര്‍ണിയയിലെ ലോസ് ആഞ്ചെലെസിലുണ്ടായ ഭൂകമ്പത്തില്‍ 4.4 തീവ്രതരേഖപ്പെടുത്തി. ഭൂചലനത്തിന്റെ പ്രഭവസ്ഥാനം ഹൈലാന്‍ഡ് പാര്‍ക്കാണ്. ഏറെ പ്രശസ്തമായ ഹോളിവുഡ് അടയാളവും ഗ്രിഫിത്ത് ഒബ്‌സര്‍വേറ്ററിക്ക് സമീപമാണ് ഭൂകമ്പത്തിന്റെ പ്രഭവകേന്ദ്രം. തിങ്കളാഴ്ച്ച ഉച്ച കഴിഞ്ഞ് 12.20ഓടെയാണ് വലിയ രീതിയില്‍ കെട്ടിടങ്ങള്‍ കുലുങ്ങാന്‍ തുടങ്ങിയത്.