ന്യൂഡല്‍ഹി: ഇന്ത്യ-യുഎസ് വ്യാപാര കരാറിനെതിരെ 'ഇന്ത്യ എഐ ഇംപാക്ട് സമ്മിറ്റ് 2026' വേദിയില്‍ യൂത്ത് കോണ്‍ഗ്രസ് പ്രതിഷേധം. പ്രവര്‍ത്തകര്‍ ഷര്‍ട്ടൂരിയാണ് പ്രതിഷേധിച്ചത്. പ്രമുഖ കമ്പനികളിലെ സാങ്കേതിക വിദഗ്ധരും സി.ഇ.ഒമാരും സംസാരിക്കുന്നതിനിടെയാണ് വേദിക്ക് പുറത്ത് മുദ്രാവാക്യം വിളികളുമായെത്തി പ്രവര്‍ത്തകര്‍ പ്രതിഷേധിച്ചത്.  പ്രതിഷേധക്കാര്‍ തുടര്‍ന്ന് ഹാളിനുള്ളിലേക്ക് അതിക്രമിച്ച് കയറുകയായിരുന്നു. 

ഇന്ത്യ-അമേരിക്ക വ്യാപാര കരാറിലൂടെ ഇന്ത്യയ്ക്ക് അര്‍ഹമായ നേട്ടങ്ങള്‍ ലഭിച്ചിട്ടില്ലെന്നും ഇത് യുഎസിനെ സഹായിക്കാനാണെന്നും ആരോപിച്ചായിരുന്നു യൂത്ത് കോണ്‍ഗ്രസ് പ്രതിഷേധം. സംഭവവുമായി ബന്ധപ്പെട്ട് പത്തോളം പേരെ പൊലിസ് കസ്റ്റഡിയിലെടുത്തതായി പി.ടി.ഐ റിപ്പോര്‍ട്ട് ചെയ്തു. യൂത്ത് കോണ്‍ഗ്രസ് ദേശീയ സെക്രട്ടറി കൃഷ്ണ ഹരി, ബിഹാര്‍ യൂത്ത് കോണ്‍ഗ്രസ് സംസ്ഥാന സെക്രട്ടറി കുന്ദന്‍ യാദവ്, യുപി യൂത്ത് കോണ്‍ഗ്രസ് വൈസ് പ്രസിഡന്റ് അജയ് കുമാര്‍, യൂത്ത് കോണ്‍ഗ്രസ് ദേശീയ കോര്‍ഡിനേറ്റര്‍ നരസിംഹ യാദവ് എന്നിവരുടെ നേതൃത്വത്തിലായിരുന്നു പ്രതിഷേധം. 

ALSO READ: ബംഗാളിൽ വോട്ടർ പട്ടികയിൽ നിന്ന് 70ലക്ഷം പേർ പുറത്തായേക്കും; രേഖകൾ ചേർക്കുന്നതിൽ ഉദ്യോഗസ്ഥർ മനഃപൂർവം കാലതാമസം വരുത്തുന്നു

പ്രധാനമന്ത്രി നരേന്ദ്ര മോദിയുടെയും യു.എസ് പ്രസിഡന്റ് ഡൊണാള്‍ഡ് ട്രംപിന്റെയും ചിത്രങ്ങളും'ഇന്ത്യ-യുഎസ് വ്യാപാര കരാര്‍', 'എപ്സ്റ്റീന്‍ ഫയല്‍സ്' തുടങ്ങിയ വാക്കുകളും ആലേഖനം ചെയ്ത വെള്ള ടി-ഷര്‍ട്ടുമായാണ് പ്രതിഷേധക്കാര്‍ എത്തിയത്. 

പ്രതിഷേധം ശക്തമായതോടെ പ്രതിഷേധക്കാരെ സുരക്ഷാ ഉദ്യോഗസ്ഥര്‍ ബലമായി നീക്കം ചെയ്യുകയും പൊലിസ് സ്റ്റേഷനിലേക്ക് മാറ്റുകയും ചെയ്തു. 

അതേസമയം, ഇന്ത്യയുടെ വളര്‍ച്ചയിലുള്ള അസൂയ മൂലമാണ് കോണ്‍ഗ്രസ് ഇത്തരത്തില്‍ പെരുമാറുന്നതെന്ന് ബി.ജെ.പി വക്താവ് നളിന്‍ കോലി ആരോപിച്ചു. കോണ്‍ഗ്രസിനെ സംബന്ധിച്ചിടത്തോളം എ.ഐ എന്നാല്‍ 'ആന്റി-ഇന്ത്യ' (anti-India) എന്നാണെന്നും, ഐ.എന്‍.സി എന്നത് യഥാര്‍ത്ഥത്തില്‍ എ.എന്‍.സി (ആന്റി നാഷണല്‍ കോണ്‍ഗ്രസ്) ആയി മാറിയിരിക്കുകയാണെന്നും അദ്ദേഹം പരിഹസിച്ചു.

 കോണ്‍ഗ്രസിന്റെ ഭാഗത്തുനിന്നുള്ള നാണക്കേടാണ് സംഭവമെന്ന് കേന്ദ്രമന്ത്രി ഭൂപേന്ദര്‍ യാദവ് ആരോപിച്ചു. ലോകത്തിലെ ഒരു സാങ്കേതിക ശക്തികേന്ദ്രമായി ഭാരതം സ്വയം നിലകൊള്ളാന്‍ മുന്നേറുന്ന സമയത്ത്, കോണ്‍ഗ്രസ് രാജ്യത്തെ നാണം കെടുത്താന്‍ ഏതറ്റം വരെയും പോകുന്നുവെന്നും ഇന്ത്യയുടെ ആഗോള പ്രതിച്ഛായ തകര്‍ക്കാനുള്ള ശ്രമമാണെന്നും അദ്ദേഹം എക്‌സില്‍ കുറിച്ചു. 

Youth Congress workers staged a dramatic protest at the India AI Impact Summit 2026 in New Delhi against the India-US trade agreement. The protesters removed their shirts and raised slogans outside the venue before allegedly attempting to enter the hall where top technology experts and CEOs were addressing the summit.