തിരുവനന്തപുരം: കേരളത്തിലെ മുഖ്യമന്ത്രിക്ക് പി.ആര്‍ ഏജന്‍സിയുടെ ആവശ്യമില്ലെന്ന് പൊതുമരാമത്ത് വകുപ്പ് മന്ത്രി മുഹമ്മദ് റിയാസ്. മാധ്യമങ്ങളെ കുറ്റപ്പെടുത്തിയായിരുന്നു വിവാദത്തില്‍ മന്ത്രിയുടെ പ്രതികരണം. പല മാധ്യമങ്ങള്‍ക്കും ഇടതു പക്ഷ വിരുദ്ധതയാണെന്ന് മന്ത്രി ചൂണ്ടിക്കാട്ടി. മുഖ്യമന്ത്രി മലപ്പുറത്തിനെതിരെ പറഞ്ഞുവെന്നാണ് കഴിഞ്ഞ ദിവസം മാധ്യമങ്ങള്‍ പ്രചാരണം നടത്തിയത്. എന്നാല്‍, ഇതിന്റെ നിജസ്ഥിതി മനസിലായതിന് ശേഷം തിരുത്താന്‍ മാധ്യമങ്ങള്‍ തയാറായോയെന്നും മുഹമ്മദ് റിയാസ് ചോദിച്ചു. കണ്ണാടിയില്‍ നോക്കിയെങ്കിലും ഈ പ്രചാരണത്തിന് മാപ്പ് പറയാന്‍ മാധ്യമങ്ങള്‍ തയാറാവണമെന്നും മന്ത്രി പറഞ്ഞു.

മാധ്യമങ്ങള്‍ക്ക് ഇക്കാര്യത്തില്‍ വ്യക്തമായ അജണ്ടയുണ്ടെന്നും മുഹമ്മദ് റിയാസ് പറഞ്ഞു. ബോധപൂര്‍വമായ രാഷ്ട്രീയ അജണ്ടയാണ് ഇക്കാര്യത്തില്‍ നടപ്പിലാക്കുന്നത്.

ഇടതുപക്ഷത്തെ തകര്‍ക്കാന്‍ തലക്കടിക്കണം. അത് മനസിലാക്കിയാണ് കേരളത്തില്‍ ഇടതുപക്ഷത്തിന്റെ തലയായ പിണറായി വിജയനെ അടിക്കാനുള്ള ശ്രമം നടത്തുന്നത്. കേരളത്തിലെ മാധ്യമങ്ങളുടെ ഉടമകള്‍ ഇടതുപക്ഷത്തെ തകര്‍ക്കാന്‍ മുന്നിട്ടിറങ്ങിയിരിക്കുകയാണെന്നും മുഹമ്മദ് റിയാസ് ആരോപിച്ചു.

ജനങ്ങളോട് കാര്യങ്ങള്‍ പറയാന്‍ ഇടനിലക്കാരന്റെ ആവശ്യമില്ല. സര്‍ക്കാറിനെതിരെ വലിയ പ്രചാരണം നടത്തിയിട്ടും ഇടതുപക്ഷത്തിന്റെ തുടര്‍ ഭരണമുണ്ടായി. ഇനിയും കേരളത്തില്‍ ഇടതുപക്ഷത്തിന്റെ ഭരണമുണ്ടാവുമെന്നും മുഹമ്മദ് റിയാസ് പറഞ്ഞു. മാധ്യമങ്ങള്‍ക്ക് കോണ്‍ഗ്രസിന് വേണ്ടിയുള്ള കനഗോലുവിന്റെ വരവ് പ്രശ്‌നമല്ലെന്നും മുഹമ്മദ് റിയാസ് കൂട്ടിച്ചേര്‍ത്തു.