ന്യൂഡല്‍ഹി: യു.പി ഉപതെരഞ്ഞെടുപ്പില്‍ ഇന്‍ഡ്യ സഖ്യം സൈക്കിള്‍ ചിഹ്നത്തില്‍ മത്സരിക്കും. സീറ്റ് പങ്കുവെക്കലിനപ്പുറം മുഴുവന്‍ സീറ്റിലും ഇന്‍ഡ്യ സഖ്യത്തെ വിജയിപ്പിക്കുന്നതിനുള്ള നടപടികളാണ് പാര്‍ട്ടി സ്വീകരിക്കുന്നതെന്നും എസ്.പി അധ്യക്ഷന്‍ അഖിലേഷ് യാദവ് വ്യക്തമാക്കി.

വലിയ വിജയത്തിനായി കോണ്‍ഗ്രസും സമാജ് വാദി പാര്‍ട്ടിയും തോളോടു തോള്‍ ചേര്‍ന്ന് പോരാടും.  ഇന്‍ഡ്യ സഖ്യം പുതുചരിത്രമെഴുതാന്‍ ഒരുങ്ങുകയാണ്. പരസ്പരം പിന്തുണ നല്‍കി ഉപതെരഞ്ഞെടുപ്പ് നടക്കുന്ന ഒമ്പത് മണ്ഡലങ്ങളിലും ഇന്‍ഡ്യ സഖ്യത്തെ വിജയിപ്പിക്കുന്നതിനുള്ള നീക്കങ്ങളാണ് നടക്കുന്നത് -അഖിലേഷ് യാദവ് പറഞ്ഞു.

ഭരണഘടനയെ സംരക്ഷിക്കാന്‍ വേണ്ടിയാണ് ഈ പോരാട്ടം. പിന്നാക്ക വിഭാഗങ്ങള്‍, ദലിതര്‍, ന്യൂനപക്ഷങ്ങള്‍ എല്ലാവര്‍ക്കും മാന്യമായി ജീവിക്കാന്‍ അവസരമുണ്ടാക്കുകയുമാണ് തെരഞ്ഞെടുപ്പ് വിജയത്തിലൂടെ തങ്ങള്‍ ലക്ഷ്യമിടുന്നതെന്നും അദ്ദേഹം കൂട്ടിച്ചേര്‍ത്തു.

നവംബര്‍ 13നാണ് യു.പിയിലെ ഒമ്പത് നിയമസഭ മണ്ഡലങ്ങളില്‍ ഉപതെരഞ്ഞെുപ്പ് നടക്കുന്നത്. കത്തേഹരി, കര്‍ഹാല്‍, മീരാപുര്‍, ഗാസിയാബാദ്, മാജ്ഹവാന്‍, ശിശഹമു, ഖായിര്‍, ഫുല്‍പൂര്‍, കുണ്ഡാര്‍കി തുടങ്ങിയ മണ്ഡലങ്ങളിലാണ് ഉപതെരഞ്ഞെടുപ്പ് നടക്കുന്നത്. എട്ട് സീറ്റുകളില്‍ എം.എല്‍.എമാര്‍ ലോക്‌സഭയിലേക്ക് മത്സരിച്ചതിനെ തുടര്‍ന്നും ഒമ്പതാമത്തെ സീറ്റ് ക്രിമിനല്‍ കേസില്‍ ശിക്ഷിക്കപ്പെട്ടതിന് തുടര്‍ന്ന് സമാജ് വാദി പാര്‍ട്ടി എം.എല്‍.എയെ അയോഗ്യനാക്കിയതിനെ തുടര്‍ന്നുമാണ് ഒഴിഞ്ഞത്.