തെഹ്‌റാന്‍: ഇസ്‌റാഈല്‍ ശനിയാഴ്ച രാവിലെ നടത്തിയ ആക്രമണത്തില്‍ രണ്ട് സൈനികര്‍ കൊല്ലപ്പെട്ടുവെന്ന് ഇറാന്‍. ആര്‍മിയാണ് സൈനികര്‍ കൊല്ലപ്പെട്ട വിവരം അറിയിച്ചത്. ആക്രമണത്തില്‍ ചെറിയ നഷ്ടം മാത്രമേ ഉണ്ടായിരുന്നുള്ളുവെന്നാണ് ഇറാന്‍ നേരത്തെ അറിയിച്ചിരുന്നത്.

ഇറാനിലെ സൈനിക കേന്ദ്രങ്ങളെ ലക്ഷ്യമിട്ട് ഇന്ന് പുലര്‍ച്ചെയാണ് ഇസ്‌റാഈല്‍ ആക്രമണം നടത്തിയിരുന്നു. പ്രാദേശിക സമയം പുലര്‍ച്ചെ 2.15ഓടെയായിരുന്നു ആക്രമണം. 

തെഹ്‌റാന്റെ വിവിധ ഭാഗങ്ങളിലും അല്‍ബോര്‍സ് പ്രവിശ്യയിലെ കറജ് നഗരത്തിലും സ്‌ഫോടനം നടന്നതായി ഇറാന്‍ മാധ്യമങ്ങള്‍ റിപ്പോര്‍ട്ട് ചെയ്തു. തെഹ്‌റാന്‍, ഖുസെസ്ഥാന്‍, ഇലാം പ്രവിശ്യകളിലാണ് ഇസ്‌റാഈല്‍ ആക്രമണം നടത്തിയതെന്ന് ഇറാന്‍ സ്ഥിരീകരിച്ചിരുന്നു. സൈനിക കേന്ദ്രങ്ങള്‍ ലക്ഷ്യമിട്ടായിരുന്നു ആക്രമണമമെന്നും എന്നാല്‍, ചെറുത്തുതോല്‍പിച്ചുവെന്നും ഇരാന്‍ അറിയിപ്പില്‍ പറഞ്ഞു.

ഇസ്‌റാഈല്‍ തലസ്ഥാനമായ തെല്‍ അവീവിന് നേരെ ഒക്ടോബര്‍ ഒന്നിന് ഇറാന്‍ മിസൈല്‍ ആക്രമണം നടത്തിയിരുന്നു. 180ലധികം മിസൈലുകളാണ് ഇറാന്‍ അയച്ചത്. ഇസ്‌റാഈലിനുനേരെ ഇറാന്‍ മിസൈല്‍ ആക്രമണത്തിനു തയാറെടുക്കുന്നതായി അമേരിക്ക മുന്നറിയിപ്പ് നല്‍കിയതിനു തൊട്ടുപിന്നാലെയാണ് ഇറാന്റെ അപ്രതീക്ഷിത തിരിച്ചടിയുണ്ടായത്.