ന്യൂയോര്‍ക്ക്: പ്രശസ്ത ആര്‍ട്ടിഫിഷ്യല്‍ ഇന്റലിജന്‍സ് (എഐ) കമ്പനിയായ ഓപ്പണ്‍ എ.ഐക്കെതിരെ വെളിപ്പെടുത്തല്‍ നടത്തിയ മുന്‍ ജീവനക്കാരനെ മരിച്ച നിലയില്‍ കണ്ടെത്തി. ഇന്ത്യന്‍ വംശജനായ സുചിര്‍ ബാലാജിയെ (26)യാണ് സാന്‍ ഫ്രാന്‍സിസ്‌കോയിലെ ഫ്‌ലാറ്റിലാണ് മരിച്ച നിലയില്‍ കണ്ടെത്തിയത്. നവംബര്‍ 26 ന് മരണം സംഭവിച്ചെങ്കിലും വിവരങ്ങള്‍ ഇപ്പോഴാണ് പുറംലോകമറിയുന്നത്. 

ഓപ്പണ്‍ എ.ഐയിലെ ആര്‍ട്ടിഫിഷ്യല്‍ ഇന്റലിജന്‍സ് ഗവേഷകനായിരുന്നു സുചിര്‍. സുചിര്‍ ബാലാജിയെ ബന്ധപ്പെടാന്‍ സാധിക്കുന്നില്ലെന്ന് സുഹൃത്തുക്കളും സഹപ്രവര്‍ത്തകരും വിളിച്ചറിയിച്ചതിനെത്തുടര്‍ന്ന് പൊലിസ് നടത്തിയ അന്വേഷണത്തിലാണ് ഇദ്ദേഹത്തിന്റെ മൃതദേഹം കണ്ടെത്തിയതെന്നാണ് സൂചന. നവംബര്‍ 26 നായിരുന്നു ഇത്. മരണത്തില്‍ സംശയിക്കേണ്ടതായ തെളിവുകള്‍ ഇതുവരെ ലഭിച്ചിട്ടില്ലെന്നും ആത്മഹത്യയാണെന്നാണ് പ്രാഥമിക നിഗമനമെന്നും പൊലിസ് അറിയിച്ചു. 

ഓപ്പണ്‍ എ.ഐ ഗുരുതരമായ പകര്‍പ്പവകാശ ലംഘനങ്ങള്‍ നടത്തുന്നതായി കമ്പനിയില്‍നിന്ന് ആഗസ്റ്റില്‍ രാജിവെച്ചതിനുപിന്നാലെ ബാലാജി ആരോപിച്ചിരുന്നു. ചാറ്റ് ജിപിടി അടക്കമുള്ള സാങ്കേതിക വിദ്യകള്‍ ഇന്റര്‍നെറ്റിനെ ദോഷകരമായി ബാധിക്കുകയാണെന്നും സുചിര്‍ വിമര്‍ശിച്ചിരുന്നു. 

ബാലാജിയുടെ ആരോപണങ്ങള്‍ക്കുപിന്നാലെ നിരവധി രചയിതാക്കളും പ്രോഗ്രാമര്‍മാരും പത്രപ്രവര്‍ത്തകരും ഓപ്പണ്‍ എ.ഐക്കെതിരെ പകര്‍പ്പവകാശ ലംഘനത്തിന് കേസുകള്‍ ഫയല്‍ ചെയ്തിരുന്നു.