കോഴിക്കോട്: കോഴിക്കോട് ട്രേഡ് സെന്ററിലെ ന്യൂ ഇയര്‍ ആഘോഷത്തിന് അനുമതിയില്ലെന്ന് മേയര്‍ ബീന ഫിലിപ്പ് അറിയിച്ചു. തണ്ണീര്‍ത്തടം നികത്തലുമായി ബന്ധപ്പെട്ട പരാതികള്‍ നിലനില്‍ക്കുന്ന പശ്ചാത്തലത്തിലാണ് തീരുമാനമെന്നും, ട്രേഡ് സെന്റര്‍ കെട്ടിടം അനധികൃത നിര്‍മ്മാണം എന്നാണ് കോര്‍പറേഷന്റെ വിലയിരുത്തല്‍ എന്ന സാഹചര്യത്തിലാണ് സ്റ്റോപ്പ് മെമ്മോ നല്‍കിയത്. 

പരിപാടിക്ക് അനുമതി നിഷേധിച്ച വിവരം പൊലിസിനെ അറിയിച്ചിട്ടുണ്ട്. പരിപാടി നടത്താനാവശ്യമായ രേഖകള്‍ സമര്‍പ്പിക്കാന്‍ ട്രേഡ് സെന്ററിന് കഴിഞ്ഞില്ലെന്നാണ് സ്റ്റോപ്പ് മെമ്മോയില്‍ പറയുന്നത്. പരാതി നിലനില്‍ക്കുന്ന സാഹചര്യത്തില്‍ സംഘര്‍ഷ സാഹചര്യം ഒഴിവാക്കാനാണ് പരിപാടിക്ക് അനുമതി നിഷേധിച്ചതെന്ന് മേയര്‍ അറിയിച്ചു. 

അവിയല്‍ ബാന്‍ഡിന്റെ ഉള്‍പ്പെടെ സംഗീത പരിപാടിയാണ് പുതുവത്സര ആഘോഷത്തിന്റെ ഭാഗമായി ഇന്ന് ട്രേഡ് സെന്ററില്‍ നടത്താനിരുന്നത്. ആയിരക്കണക്കിന് പേര്‍ പങ്കെടുക്കാനിരുന്ന പരിപാടിയാണ്. പരിപാടി നടത്തുന്നതിന് പിപിആര്‍ ലൈസന്‍സ് അനുവദിക്കുന്നതിന് മതിയായ രേഖകളില്ല എന്നാണ് സ്റ്റോപ്പ് മെമ്മോയില്‍ പറയുന്നത്. അതേസമയം കോടതിയില്‍ നിന്ന് അനുകൂല ഉത്തരവ് ലഭിക്കുമെന്ന പ്രതീക്ഷയിലാണ് സംഘാടകര്‍.

The Kozhikode Corporation has denied permission for New Year celebrations at the Trade Centre, citing concerns over public safety and order, and has issued a stop memo to prevent any events.