ഗൗതം ഗംഭീറിന്റെ കീഴിൽ സമീപകാലങ്ങളിൽ ഇന്ത്യൻ ക്രിക്കറ്റ് ടീം നിരാശാജനകമായ പ്രകടനങ്ങളാണ് കാഴ്ചവെച്ചുകൊണ്ടിരിക്കുന്നത്. അടുത്തിടെ അവസാനിച്ച ബോർഡർ ഗവാസ്കർ ട്രോഫിയിൽ ഓസ്‌ട്രേലിയയോടും ഇന്ത്യ മോശം പ്രകടനമാണ് നടത്തിയത്. അഞ്ചു മത്സരങ്ങളുടെ പരമ്പര ഓസ്‌ട്രേലിയ 2-1നാണ് വിജയിച്ചത്. ഈ തോൽവിയോടെ ഇന്ത്യ വേൾഡ് ടെസ്റ്റ് ചാമ്പ്യൻഷിപ്പിന്റെ ഫൈനലിൽ നിന്നും പുറത്താവുകയും ചെയ്തു.

ഇപ്പോൾ ഈ മോശം പ്രകടനങ്ങൾക്ക് പിന്നാലെ ഗംഭീറിനെ വിമർശിച്ചുകൊണ്ട് സംസാരിക്കുകയാണ് മുൻ താരം മനോജ് തിവാരി. ഇന്ത്യൻ പ്രീമിയർ ലീഗിൽ കൊൽക്കത്ത നൈറ്റ് റൈഡേഴ്‌സ് കിരീടം നേടിയതിന്റെ ക്രെഡിറ്റ് മുഴവനും ഗംഭീറിന് നൽകുന്നത് ശരിയല്ലെന്നാണ് മനോജ് തിവാരി പറഞ്ഞത്. 

'ഞങ്ങൾ എല്ലാവരും ഒരു യൂണിറ്റായി പ്രകടനം നടത്തി. അല്ലാതെ ഗൗതം ഗംഭീർ ഒറ്റക്ക് കെകെആറിനെ കിരീടത്തിലേക്ക് നയിച്ചതല്ല. കാലിസും നരെയ്‌നും ഞാനും ഈ ലക്ഷ്യത്തിൽ എത്താനായി മികച്ച സംഭാവനകാൾ നൽകി. എന്നാൽ ഇതിന്റെ ക്രെഡിറ്റ് ആരാണ് എടുത്തത്? ഗംഭീറിന് എല്ലാ ക്രെഡിറ്റും എടുക്കാൻ അനുവദിക്കുന്ന ഒരു പിആർ നിലനിക്കുന്നുണ്ട്,' ഗംഭീർ പറഞ്ഞു.

ഇംഗ്ലണ്ടിനെതിരായ പരമ്പരയാണ് ഇനി ഇന്ത്യയുടെ മുന്നിലുള്ളത്. അഞ്ച് ട്വന്റി ട്വന്റിയും മൂന്ന് ഏകദിനവുമാണ്‌ പാരമ്പരയിലുള്ളത്. ട്വന്റി ട്വന്റി പരമ്പര ജനുവരി 22 മുതൽ ഫെബ്രുവരി രണ്ട് വരെയാണ് നടക്കുക. ഏകദിന പരമ്പര ഫെബ്രുവരി ആറ് മുതൽ  ഫെബ്രുവരി 12 വരെയും നടക്കും. ഇത് കഴിഞ്ഞാൽ ചാമ്പ്യൻസ് ട്രോഫിയിൽ ആയിരിക്കും ഇന്ത്യ കളിക്കുക. ഫെബ്രുവരി 19 മുതൽ മാർച്ച് ഒമ്പത് വരെയാണ് ചാമ്പ്യൻസ് ട്രോഫി നടക്കുന്നത്.ചാമ്പ്യൻസ് ട്രോഫിയിൽ ഗ്രൂപ്പ് എയിൽ ആണ് ഇന്ത്യ ഉള്ളത്. ബംഗ്ലാദേശ്, പാകിസ്താൻ, ന്യൂസിലാൻഡ് എന്നീ ടീമുകളാണ് ഇന്ത്യക്കൊപ്പം ഉള്ളത്.