കോഴിക്കോട്: നാദാപുരം വളയത്ത് കിണറ്റില്‍ വീണ കാട്ടുപന്നിയെ കൊന്നു കറിവെച്ച യുവാക്കളെ വനംവകുപ്പ് പിടികൂടി. വളയം കുറുവന്തേരി സ്വദേശികളായ വിഷ്ണു, റിനു, അശ്വിന്‍, ബിനു എന്നിവരെയാണ് വനംവകുപ്പ് പിടികൂടിയത്. രണ്ട് വീടുകളില്‍ നിന്ന് ഇറച്ചിയും വനംവകുപ്പ് പിടികൂടി.കുറ്റ്യാടി റേഞ്ച് ഫോറസ്റ്റ് ഓഫീസറുടെ നേതൃത്വത്തിലുള്ള സംഘമാണ് വീടുകളില്‍ റെയ്ഡ് നടത്തി പ്രതികളെ കസ്റ്റഡിയിലെടുത്തത്.

ഞായറാഴ്ച്ച രാവിലെയാണ് വളയത്തെ വീട്ട് കിണറ്റില്‍ കാട്ടുപന്നി വീണത്. നാട്ടുകാര്‍ കുറ്റ്യാടി ഫോറസ്റ്റ് ഓഫീസില്‍ വിവരം അറിയിച്ചെങ്കിലും വനംവകുപ്പ് എത്തിയപ്പോള്‍ പന്നി രക്ഷപ്പെട്ടെന്നാണ് മറുപടി നല്‍കിയത്. സംശയം തോന്നി നടത്തിയ അന്വേഷണത്തിലാണ് 60 കിലോയിലധികം വരുന്ന പന്നിയെ കൊന്ന് ഇറച്ചി 20 ലധികം പേര്‍ക്ക് വീതിച്ചതായി കണ്ടെത്തിയത്. പിന്നാലെ ഇവരെ കസ്റ്റഡിയിലെടുക്കുകയും അറസ്റ്റ് രേഖപ്പെടുത്തുകയുമായിരുന്നു.