ന്യൂഡല്‍ഹി: ഡല്‍ഹി നിയമസഭാ തെരഞ്ഞെടുപ്പ് പരാജയത്തിന് ശേഷം ഇന്‍ഡ്യാ സഖ്യത്തിലുടലെടുത്ത അതൃപ്തി നിലനില്‍ക്കെ ശിവസേന(ഉദ്ധവ്) നേതാവ് ആദിത്യ താക്കറെ പ്രതിപക്ഷ നേതാവ് രാഹുല്‍ ഗാന്ധി, ആം ആദ്മി പാര്‍ട്ടി നേതാവ് അരവിന്ദ് കെജ്രിവാള്‍ എന്നിവരുമായി കൂടിക്കാഴ്ച നടത്തി.

ബുധനാഴ്ച രാത്രി പ്രതിപക്ഷനേതാവ് രാഹുല്‍ ഗാന്ധിയെ സന്ദര്‍ശിച്ച ആദിത്യ താക്കറെ ഇന്നലെ വൈകുന്നേരമാണ് ആം ആദ്മി പാര്‍ട്ടി നേതാവ് അരവിന്ദ് കെജ്രിവാളുമായി കൂടിക്കാഴ്ച നടത്തിയത്. രാജ്യത്തെ രാഷ്ട്രീയ സ്ഥിതിഗതികള്‍ ചര്‍ച്ചയായെന്നും പ്രതിപക്ഷ പാര്‍ട്ടികളുടെ ഐക്യത്തെ കുറിച്ചുള്ള ശിവസേനയുടെ നിലപാട് രാഹുല്‍ ഗാന്ധിയെയും അരവിന്ദ് കെജ്രിവാളിനെയും അറിയിച്ചതായും ആദിത്യ താക്കറെ മാധ്യമ പ്രവര്‍ത്തകരോട് പറഞ്ഞു.

രാജ്യത്തെ ജനാധിപത്യം കടുത്ത ഭീഷണി നേരിടുകയാണ്. ജനാധിപത്യം അവസാനിപ്പിക്കാനുള്ള നീക്കങ്ങളാണ് ചിലര്‍ നടത്തുന്നത്. രാജ്യത്ത് സ്വതന്ത്രവും നീതിയുക്തവുമായി തെരഞ്ഞെടുപ്പ് നടക്കുന്നില്ല. അതാണ് മഹാരാഷ്ട്രയിലും ഇപ്പോള്‍ ഡല്‍ഹിയിലും നടന്നത്. 

ഇലക്ട്രോണിക് വോട്ടിങ് യന്ത്രങ്ങളിലെ ക്രമക്കേടുകളെ കുറിച്ചുള്ള പരാതികള്‍ ഉയര്‍ന്നിട്ടും നടപടിയുണ്ടാകുന്നില്ല. രാജ്യത്തിന്റെ ഭാവിക്കുവേണ്ടിയാണ് ഇന്‍ഡ്യാ സഖ്യം പോരാടുന്നത്. അത് തുടരുക തന്നെ ചെയ്യും. സഖ്യത്തിന്റെ മുന്നോട്ടുള്ള പ്രയാണം തീരുമാനിക്കാന്‍ മുതിര്‍ന്ന നേതാക്കളുണ്ടെന്നും ആദിത്യ താക്കറെ പറഞ്ഞു.