കൊച്ചി: നടന്‍ മമ്മൂട്ടിക്കെതിരായ സൈബര്‍ ആക്രണമത്തെ തള്ളി മന്ത്രി പി.രാജീവ്. ആരെങ്കിലും എവിടെയെങ്കിലും നിന്ന് പറയുന്നതല്ല പ്രധാനം. തിരക്കുകള്‍ക്കിടയിലും മമ്മൂട്ടി അവിടെയെത്തി എന്നതാണ് കാണേണ്ടത്. മമ്മൂട്ടി എത്തിയതോടെ  വയനാട് ടൗണ്‍ഷിപ്പ് പദ്ധതിയെക്കുറിച്ച് കൂടുതല്‍ ലോകമറിഞ്ഞുവെന്നും പി രാജീവ് പറഞ്ഞു. 

ഇത്രയും തിരക്കുകള്‍ക്കിടയിലും മഹാനടനായ മമ്മൂട്ടിക്കുപോലും അവിടെ പോയി അത് കാണണം എന്ന് തോന്നുന്ന മഹത്തായ ഒരു മാതൃക നമുക്ക് ലോകത്തിന് മുമ്പില്‍ കാഴ്ചവെക്കാന്‍ കഴിഞ്ഞില്ലേ.. അദ്ദേഹം എന്താണ് വികസനമെന്ന് പറഞ്ഞ വാക്കുകള്‍ അങ്ങേയറ്റം പ്രസക്തമാണെന്നും മന്ത്രി പറഞ്ഞു. 

മമ്മൂട്ടി വയനാട് ടൗണ്‍ഷിപ്പ് സന്ദര്‍ശിച്ചതിലൂടെ ലോകത്തിനുമുമ്പില്‍ ആ പദ്ധതിക്ക് കൂടുതല്‍ ശ്രദ്ധ ലഭിച്ചു. വയനാട് ടൗണ്‍ഷിപ്പ് സന്ദര്‍ശിക്കാന്‍ മമ്മൂട്ടിക്ക് തോന്നിയതില്‍ പ്രത്യേകം നന്ദി രേഖപ്പെടുത്തുകയാണെന്നും പി. രാജീവ് പറഞ്ഞു.

ALSO READ: പാലക്കാട്ടെ ബിജെപിയിൽ തമ്മിലടി തുടരുന്നു; ശോഭാ സുരേന്ദ്രന്റെ പ്രചരണ പരിപാടിക്ക് പ്രശാന്ത് ശിവൻ എത്തില്ല, സീറ്റ് കിട്ടാത്തതിൽ പിണക്കം

ടൗണ്‍ഷിപ്പ് സന്ദര്‍ശനത്തിനിടെ തന്റെയൊപ്പം നടന്ന സി.പി.എം വയനാട് ജില്ലാ സെക്രട്ടറി കെ റഫീഖിനോട് മമ്മൂട്ടി നീരസം പ്രകടിപ്പിച്ചത് ഇടത് കേന്ദ്രങ്ങളില്‍ വന്‍ വിമര്‍ശനങ്ങള്‍ക്കിടയാക്കിയിരുന്നു. ഇതുസംബന്ധിച്ചാണ് മന്ത്രി പി. രാജീവിന്റെ പ്രതികരണം, 

ഇന്നലെയാണ് മുണ്ടക്കൈ, ചൂരല്‍മല ഉരുള്‍ ദുരന്തബാധിതര്‍ക്കായി കല്‍പ്പറ്റ എല്‍സ്റ്റണ്‍ എസ്റ്റേറ്റില്‍ സര്‍ക്കാര്‍ നിര്‍മിക്കുന്ന പുനരധിവാസ ടൗണ്‍ഷിപ്പ് നടന്‍ മമ്മൂട്ടി സന്ദര്‍ശിച്ചത്. ഇന്നലെ ഉച്ചയ്ക്ക് 12നാണ് നിര്‍മാതാവ് ആന്റോ ജോസഫിനൊപ്പം മമ്മൂട്ടി ടൗണ്‍ഷിപ്പിലെത്തിയത്.

ടൗണ്‍ഷിപ്പിലെ ഒന്നാം സോണിലെ വീടുകള്‍ സന്ദര്‍ശിച്ച് സൗകര്യങ്ങള്‍ വിലയിരുത്തിയ അദ്ദേഹം ചീഫ് ഓപറേറ്റിങ്ങ് ഓഫിസര്‍ ഡോ. ജെ.ഒ അരുണിനോട് നിര്‍മാണവുമായി ബന്ധപ്പെട്ട കാര്യങ്ങളും ചോദിച്ചറിഞ്ഞു. നടന്നും വാഹനത്തിലുമായി ഒന്നാം സോണിലെ മുഴുവന്‍ നിര്‍മാണ പ്രവര്‍ത്തനങ്ങള്‍ വിലയിരുത്തിയാണ് നടന്‍ മടങ്ങിയത്.

മമ്മൂട്ടി എത്തിയതറിഞ്ഞ് നിരവധിപേരും ടൗണ്‍ഷിപ്പിലെത്തിയിരുന്നു. ഇന്നലെ രാവിലെ സി.പി.എം ദേശീയ സെക്രട്ടറി എം.എ ബേബിയും ടൗണ്‍ഷിപ്പ് സന്ദര്‍ശിച്ചിരുന്നു.

Kerala Industries Minister P. Rajeev dismissed cyber attacks related to actor Mammootty attending an event connected to a township project. The minister said that despite his busy schedule, Mammootty took the time to visit the venue, which helped bring greater public attention to the project.