സോഷ്യല്‍ മീഡിയയില്‍ വൈറലാവാന്‍ വേണ്ടി പലരും പുതുമയുള്ള പല വിഡിയോകളും പങ്കുവയ്ക്കാറുണ്ട്. അദ്ഭുതപ്പെടുത്തുന്ന എന്തെങ്കിലുമൊക്കെ ചെയ്യാന്‍ ആളുകള്‍ ആഗ്രഹിക്കുന്നു. അങ്ങനെയാണ് കാറുമായി ബന്ധപ്പെട്ട  വിഡിയോ കണ്ടത്. സോഷ്യല്‍ മീഡിയയില്‍ കൊടുങ്കാറ്റായിട്ടുണ്ട് ഈ കാര്‍. വിഡിയോയില്‍ കാണുന്നത് കാര്‍ ഒരു രൂപയുടെ നാണയങ്ങള്‍ കൊണ്ട് അലങ്കരിച്ചിരിക്കുന്നതാണ്.

കാര്‍ പൂര്‍ണമായും നാണയം കൊണ്ടാണ് അലങ്കരിച്ചിരിക്കുന്നത്. ഈ കാറിന്റെ ഡിസൈന്‍ കണ്ട് ആളുകളൊക്കെ ഒന്നു ഞെട്ടിയിരിക്കുകയാണ്. മാത്രമല്ല, നാണയങ്ങള്‍ ഒട്ടിക്കാനുള്ള പരിശ്രമം കണ്ട് അതിലും അതിശയിച്ചു നില്‍ക്കുകയാണ് ആളുകള്‍. 'എക്‌സ്പിരിമെന്റ് കിങ്' എന്ന ഇന്‍സ്റ്റഗ്രാം അക്കൗണ്ടിലാണ് വിഡിയോയുള്ളത്. 'പൈസാവാലി കാര്‍' എന്ന അടിക്കുറിപ്പോടെയാണ് വിഡിയോ പോസ്റ്റ് ചെയ്തിരിക്കുന്നത്. എന്നാല്‍ കാറിനെ കുറിച്ചുള്ള മറ്റു വിവരങ്ങളൊന്നും പറഞ്ഞിട്ടുമില്ല. 

വിഡിയോയില്‍ കാണുന്നത്, വിചനമായ സ്ഥലത്ത് കാര്‍ ഒറ്റയ്ക്കു നില്‍ക്കുന്നതാണ്. രാജസ്ഥാനില്‍ നിന്നാണ് കാറിന്റെ നമ്പര്‍ പ്ലേറ്റ് രജിസ്റ്റര്‍ ചെയ്തിരിക്കുന്നത്. അതിനാല്‍ രാജസ്ഥാനിലുള്ള ആരെങ്കിലുമാവാം ഈ കാറിന്റെ ഉടമ. കാറിന്റെ മുഴുവന്‍ ഭാഗങ്ങളിലും ഒട്ടിച്ചിരിക്കുന്നത് ഒരു രൂപയുടെ നാണയങ്ങള്‍ മാത്രമാണ്.

തിളങ്ങുന്ന ലോഹനാണയങ്ങള്‍ കൊണ്ട് പൊതിഞ്ഞിരിക്കുന്ന കാര്‍. കലാസൃഷ്ടി അപാരം തന്നെ. നാണയങ്ങള്‍ ഒട്ടിക്കാത്ത ഒരു ഭാഗവും കാറിനില്ല. നല്ല വൃത്തിയോടെ ഭംഗിയോടെയാണ് ഇത് ചെയ്തിരിക്കുന്നത്.

കാറിന്റെ വശങ്ങളിലുള്ള കണ്ണാടികളില്‍ പോലും നാണയം ഒട്ടിച്ചിരിക്കുന്നു. കാറിന്റെ നിറം തന്നെ വെള്ളിക്കളറായിട്ടുണ്ട്. നമ്പര്‍ പ്ലേറ്റും മുന്‍ഭാഗവും പിന്‍ഭാഗവും എല്ലാം നാണയങ്ങളാണ്. ഒരുപാട് രസകരമായ കമന്റുകളുമാണ് ഉപയോക്താക്കള്‍ ഇതിനു നല്‍കിയിരിക്കുന്നത്.