ദുബൈ: റമദാന്‍ മാസത്തില്‍ സൂപ്പര്‍മാര്‍ക്കറ്റുകളില്‍ 10,000ത്തിലധികം പലചരക്ക് സാധനങ്ങള്‍ക്ക് 65 ശതമാനം വരെ കിഴിവ് ലഭിക്കുമെന്ന് യുഎഇ സാമ്പത്തിക മന്ത്രാലയം. ഇതുവഴി യുഎഇയിലെ ഉപഭോക്താക്കള്‍ക്ക് ഏകദേശം 35 മില്യണ്‍ ദിര്‍ഹം ലാഭിക്കാന്‍ കഴിയുമെന്ന് യുഎഇ സാമ്പത്തിക മന്ത്രാലയം അറിയിച്ചു.

യുഎഇയിലെ ഷോപ്പര്‍മാരുടെ സാമ്പത്തിക ബാധ്യതകള്‍ ലഘൂകരിക്കുന്നതിനായി, ആയിരക്കണക്കിന് ഉല്‍പ്പന്നങ്ങള്‍ക്ക്  റമദാന്‍ കിഴിവുകള്‍ നല്‍കുന്നതിനായി പ്രധാന റീട്ടെയിലര്‍മാരുമായി മന്ത്രാലയം സഹകരിച്ച് പ്രവര്‍ത്തിക്കുന്നുണ്ടെന്ന് ചൊവ്വാഴ്ച നടന്ന പത്രസമ്മേളനത്തില്‍ മന്ത്രാലയം അറിയിച്ചു.

കൂടാതെ, ദിവസേനയുള്ള പുതിയ ഉല്‍പന്ന ഇറക്കുമതി ചെയ്യുന്നത് അധികൃതര്‍ ഉറപ്പുവരുത്തും. ദുബൈയുടെ അല്‍ അവീറിലെ സെന്‍ട്രല്‍ മാര്‍ക്കറ്റില്‍ കുറഞ്ഞത് 15,000 ടണ്‍ പഴങ്ങളും പച്ചക്കറികളും എത്തും. 'വിതരണക്ഷാമം തടയുന്നതിനും രാജ്യത്തുടനീളം മത്സരാധിഷ്ഠിത വില നിലനിര്‍ത്തുന്നതിനുമാണ് ഈ നടപടികള്‍ സ്വീകരിച്ചിരിക്കുന്നത്,' മന്ത്രാലയം പറഞ്ഞു.

റമദാന് മുന്നോടിയായി ഉപഭോക്തൃ സംരക്ഷണവും വിപണി സ്ഥിരതയും നിയന്ത്രിക്കുന്നതിനുള്ള ശ്രമങ്ങള്‍ മന്ത്രാലയം ശക്തമാക്കിയിട്ടുണ്ട്. ന്യായമായ വിലനിര്‍ണ്ണയം ഉറപ്പാക്കുന്നതിനും വിപണി ചൂഷണം തടയുന്നതിനും അവശ്യവസ്തുക്കളുടെ വിതരണം സ്ഥിരമായി നിലനിര്‍ത്തുന്നതിനുമുള്ള നിരവധി സംരംഭങ്ങള്‍ക്ക് മന്ത്രാലയം രൂപം നല്‍കിയിട്ടുണ്ട്.

'ആഗോളതലത്തിലെ മികച്ച രീതികള്‍ക്ക് അനുസൃതമായി വിപണിയില്‍ ന്യായവും നീതിയുക്തവും വില സ്ഥിരതയും ഉറപ്പാക്കുന്നതിന് യുഎഇ ശക്തമായ ഒരു സംവിധാനം വികസിപ്പിച്ചെടുത്തിട്ടുണ്ട്' എന്ന് സാമ്പത്തിക മന്ത്രാലയത്തിലെ വാണിജ്യ നിയന്ത്രണ വകുപ്പ് ഡയറക്ടര്‍ സുല്‍ത്താന്‍ അഹമ്മദ് ദര്‍വിഷ് പറഞ്ഞു. 

'ഫെഡറല്‍, തദ്ദേശ സ്വയംഭരണ സ്ഥാപനങ്ങളുമായും സ്വകാര്യ മേഖലയിലെ പങ്കാളികളുമായും അടുത്ത് പ്രവര്‍ത്തിക്കുന്നതിലൂടെ, ഉപഭോക്താക്കളെ സംരക്ഷിക്കുകയും വിപണിയില്‍ സുതാര്യത ഉറപ്പാക്കുകയും ചെയ്യുന്ന നിയന്ത്രണങ്ങള്‍ ഞങ്ങള്‍ തുടര്‍ന്നും വികസിപ്പിക്കും,' അദ്ദേഹം കൂട്ടിച്ചേര്‍ത്തു.

ഉപഭോക്തൃ സംരക്ഷണം ശക്തിപ്പെടുത്തുന്നതിനായി സര്‍ക്കാര്‍ നിരവധി നടപടികള്‍ സ്വീകരിച്ചിട്ടുണ്ട്. അതില്‍ ഉപഭോക്തൃ സംരക്ഷണ നിയമത്തിലും അതിന്റെ എക്‌സിക്യൂട്ടീവ് ചട്ടങ്ങളിലും കാര്യമായ ഭേദഗതികള്‍ കൊണ്ടുവന്ന 2023 ലെ ഫെഡറല്‍ ഡിക്രിലോ നമ്പര്‍ 5ഉം ഉള്‍പ്പെടുന്നു.

റമദാന്‍ കാലത്ത് മന്ത്രാലയത്തിന്റെ പ്രധാന മുന്‍ഗണനകളിലൊന്ന് അവശ്യവസ്തുക്കളുടെ വില സ്ഥിരത ഉറപ്പാക്കുക എന്നതാണ്. ഈ സമയത്ത് ഉപഭോക്തൃ ആവശ്യം സാധാരണയായി വര്‍ധിക്കാറുണ്ട്.

പുതിയ വിലനിര്‍ണ്ണയ നയം പ്രകാരം, പാചക എണ്ണ, മുട്ട, പാലുല്‍പ്പന്നങ്ങള്‍, അരി, പഞ്ചസാര, കോഴി, പയര്‍വര്‍ഗ്ഗങ്ങള്‍, റൊട്ടി, ഗോതമ്പ് തുടങ്ങിയ ഒമ്പത് പ്രധാന ഇനങ്ങള്‍ക്ക് സര്‍ക്കാര്‍ അനുമതിയില്ലാതെ വില വര്‍ധിപ്പിക്കാന്‍ കഴിയില്ല. 

2024 ന്റെ തുടക്കം മുതല്‍ പ്രധാന റീട്ടെയിലര്‍മാരുമായും വിതരണക്കാരുമായും മന്ത്രാലയം 60 ലധികം മീറ്റിംഗുകള്‍ നടത്തിയിട്ടുണ്ട്. പുതുക്കിയ വിലനിര്‍ണ്ണയ നിയന്ത്രണങ്ങള്‍ പാലിക്കാനും വിതരണ ശൃംഖല സ്ഥിരത നിലനിര്‍ത്താനും അവരോട് ആവശ്യപ്പെട്ടു. 'അവശ്യവസ്തുക്കള്‍ താങ്ങാനാവുന്നതിലും ആക്‌സസ് ചെയ്യാവുന്നതുമായി നിലനിര്‍ത്തിക്കൊണ്ട് ചില്ലറ വ്യാപാരികളും വിതരണക്കാരും ഉത്തരവാദിത്തത്തോടെ പ്രവര്‍ത്തിക്കുന്നുവെന്ന് ഉറപ്പാക്കുക എന്നതാണ് ഞങ്ങളുടെ മുന്‍ഗണന,' ദര്‍വിഷ് പറഞ്ഞു.

വില നിരീക്ഷണത്തിനായുള്ള ദേശീയ ഡിജിറ്റല്‍ പ്ലാറ്റ്‌ഫോം മന്ത്രാലയം അതിന്റെ നിയന്ത്രണ തന്ത്രത്തിന്റെ ഭാഗമായി ആരംഭിച്ചിരുന്നു. പ്രധാന സൂപ്പര്‍മാര്‍ക്കറ്റ് ശൃംഖലകളിലും സഹകരണ സംഘങ്ങളിലും അവശ്യവസ്തുക്കളുടെ വിലയിലെ ഏറ്റക്കുറച്ചിലുകള്‍ നിരീക്ഷിക്കാന്‍ ഈ തത്സമയ ട്രാക്കിംഗ് സംവിധാനം അധികാരികളെ പ്രാപ്തരാക്കുന്നു. വിവിധ റീട്ടെയില്‍ ഔട്ട്‌ലെറ്റുകളിലെ യഥാര്‍ത്ഥ വിലകള്‍ താരതമ്യം ചെയ്യാന്‍ ഈ സംവിധാനം റെഗുലേറ്റര്‍മാരെ അനുവദിക്കും. ഇത് ചില്ലറ വ്യാപാരികള്‍ വിപണി ആവശ്യകതയെ ചൂഷണം ചെയ്യുന്നതില്‍ നിന്ന് തടയുകയും ചെയ്യുന്നു.

കൂടാതെ മന്ത്രാലയം രാജ്യവ്യാപകമായി മാര്‍ക്കറ്റ് പരിശോധനകള്‍ ശക്തമാക്കിയിട്ടുണ്ട്. 2024 ല്‍ മാത്രം ഉദ്യോഗസ്ഥര്‍ 80,249 പരിശോധനകള്‍ നടത്തി. അതിന്റെ ഫലമായി വിലയില്‍ ക്രമക്കേടു നടത്തിയതിന് 8,388 ലംഘനങ്ങളാണ് രേഖപ്പെടുത്തിയത്.

2025 ജനുവരി മുതല്‍ 768 പരിശോധനകള്‍ കൂടി നടത്തിയിട്ടുണ്ട്. റമദാനിലുടനീളം 420 പരിശോധനകള്‍ കൂടി നടത്താന്‍ പദ്ധതിയിട്ടിട്ടുണ്ട്. വിലനിര്‍ണ്ണയ ലംഘനങ്ങളും തെറ്റിദ്ധരിപ്പിക്കുന്ന പ്രമോഷനുകളും സംബന്ധിച്ച പരാതികള്‍ പരിഹരിക്കുന്നതിനായി മന്ത്രാലയം അതിന്റെ ഉപഭോക്തൃ പരാതി സംവിധാനവും ലളിതമാക്കിയിട്ടുണ്ട്.