കൊച്ചി: എറണാകുളം വാർഫിൽ വൻ തീപിടിത്തം. സൾഫർ കയറ്റുന്നതിനായി ഉപയോഗിച്ച കൺവെയർ ബെൽറ്റിനാണ് ആദ്യം തീപിടിച്ചത്. തീ പെട്ടെന്ന് തന്നെ ക്യൂ-10 ഷെഡിനു സമീപം സൂക്ഷിച്ചിരുന്ന സൾഫറിലേക്ക് പടർന്നു.

സംഭവം അടിയന്തരമായി കൈകാര്യം ചെയ്യാൻ കൊച്ചിയിലെ വിവിധ ഫയർ സ്റ്റേഷനുകളിൽ നിന്ന് പത്തോളം യൂണിറ്റുകൾ എത്തി. കഠിന ശ്രമത്തിനൊടുവിൽ തീ നിയന്ത്രണവിധേയമാക്കാൻ സാധിച്ചു.

ജില്ലാ ഫയർ ഓഫിസർ കെ. ഹരികുമാറിന്റെ നേതൃത്വത്തിൽ നടത്തിയ പരിശോധനയിൽ, തീ കൂടുതൽ സ്ഥലത്തേക്ക് വ്യാപിച്ചിട്ടില്ലെന്ന് സ്ഥിരീകരിച്ചു. നിലവിൽ ആശങ്കപ്പെടേണ്ട സാഹചര്യമില്ലെന്നും സുരക്ഷാ മുൻകരുതലെന്ന നിലയിൽ പ്രദേശത്ത് നിരീക്ഷണം തുടരുമെന്നും ഫയർഫോഴ്സ് അറിയിച്ചു.