തൊടുപുഴ: പീക്ക് ലോഡ് ഡിമാന്റിനൊപ്പം പ്രതിദിന വൈദ്യുതി ഉപഭോഗവും കുതിച്ചുയർന്നതോടെ വൈദ്യുതി ബോർഡ് ജാഗ്രതയിൽ. ഇതിനിടെ 50 മെഗാവാട്ടിന്റെ കക്കാട് പദ്ധതി പരിശോധനകൾക്കായി പൂർണമായും ഷട്ട്ഡൗൺ ചെയ്തത് തിരിച്ചടിയായി. ഇടുക്കിയിലെ ഉത്പാദനം ഉയർത്തിയാണ് പ്രശ്‌നം ഒരളവുവരെ പരിഹരിക്കുന്നത്. കഴിഞ്ഞ ഒന്നിന് 9.89 കോടി യൂനിറ്റിലേക്കുയർന്ന വൈദ്യുതി ഉപഭോഗം ഇന്നലെ 9.68 കോടി യൂനിറ്റിലേക്ക് താഴ്‌ന്നെങ്കിലും ഇന്നുമുതൽ കുതിച്ചുയരുന്നതിന്റെ സൂചനകളാണ് കാണിക്കുന്നത്. 

ഇന്നലത്തെ കൂടിയ പീക്ക് ലോഡ് ഡിമാന്റ് 4919 മെഗാവാട്ടായിരുന്നു. ഇന്നോ നാളെയോ ഡിമാന്റ് 5000 മെഗാവാട്ട് കടക്കാനാണ് സാധ്യത. പീക്ക് സമയങ്ങളിൽ ജലവൈദ്യുതി പദ്ധതികളിൽ നിന്ന് പരമാവധി ലഭ്യമാകുന്നത് 1500 മെഗാവാട്ട് വരെയാണ്. ഇതിനിടെയാണ് കക്കാട് പദ്ധതി 10 ദിവസത്തേക്ക് ഷട്ട്ഡൗൺ ചെയ്യേണ്ടിവന്നത്. 25 മെഗാവാട്ട് വീതം ശേഷിയുള്ള രണ്ട് ജനറേറ്ററുകളാണ് കക്കാട് ഉള്ളത്. പെൻസ്റ്റോക്കിലെ സർജ് ഷാഫ്റ്റ് ഗെയ്റ്റ് പരിശോധനകൾക്കും അറ്റകുറ്റപ്പണികൾക്കുമായാണ് ഈ മാസം 13 വരെ ഷട്ട്ഡൗൺ ചെയ്തത്.

ഇതോടെ പ്രതിദിനം ശരാശരി 8.64 ലക്ഷം യൂനിറ്റ് വൈദ്യുതിയുടെ കുറവുണ്ടാകുന്നുണ്ട്. ഫെബ്രുവരി 13 മുതൽ 10 ദിവസത്തേക്ക് പദ്ധതി ഷട്ട് ഡൗൺ ചെയ്യാൻ അനുമതി തേടിയെങ്കിലും പ്രതിസന്ധി മുൻനിർത്തി കളമശേരി ലോഡ് ഡെസ്പാച്ച് സെന്റർ ചീഫ് എൻജിനീയർ അനുമതി നിഷേധിക്കുകയായിരുന്നു. കുട്ടനാട് പാടശേഖരങ്ങളിലെ ജലവിതാനം നിലനിർത്താൻ കക്കാട് പദ്ധതിയിലെ ഉത്പാദനം അത്യന്താപേക്ഷിതമാണ്.

എന്നാൽ ഒഴിവാക്കാൻ കഴിയാത്ത സാഹചര്യത്തിലാണ് ഇപ്പോൾ ഷട്ട് ഡൗണിന് ഡയരക്ടർ ബോർഡ് അനുമതി നൽകിയത്. പ്രതിസന്ധി തരണം ചെയ്യാൻ  ഇടുക്കി പദ്ധതിയിലെ മൂലമറ്റം പവർ ഹൗസിൽ ഉത്പാദനം ഇന്നലെ മുതൽ ഒരുകോടി യൂനിറ്റിലേക്ക് ഉയർത്തി. പദ്ധതിയിലെ ആറ് ജനറേറ്ററുകളും പൂർണതോതിൽ പ്രവർത്തിപ്പിക്കുന്നുണ്ട്. ഇന്നലെ സംസ്ഥാനത്ത് ഉപയോഗിച്ച 96.8862 ദശലക്ഷം യൂനിറ്റ് വൈദ്യുതിയിൽ 75.859 ദശലക്ഷം യൂനിറ്റും പുറം വൈദ്യുതിയാണ്. 21.0272 ദശലക്ഷം യൂനിറ്റായിരുന്നു ആഭ്യന്തര ഉത്പാദനം.