കോഴിക്കോട്: വെള്ളയില്‍ അടിപിടി കേസില്‍ പൊലിസ് കസ്റ്റഡിയിലെടുത്ത ആളുടെ വീട് കത്തി നശിച്ച നിലയില്‍. വെള്ളയില്‍ സ്വദേശി ഫൈജാസിന്റെ വീടാണ് കത്തി നശിച്ചിരിക്കുന്നത്. അടിപിടി കേസുമായി ബന്ധപ്പെട്ടാണ് ഇയാളെ ഇന്നലെ പൊലിസ് കസ്റ്റഡിയില്‍ എടുത്തത്.

 അമിത മദ്യപാനിയായ ഫൈജാസ് ലഹരി വസ്തുക്കളും ഉപയോഗിക്കാറുണ്ടെന്ന് സ്ഥലം കൗണ്‍സിലര്‍ ആരോപിച്ചിരുന്നു. കഴിഞ്ഞ ഞായറാഴ്ച ഫൈജാസും നാട്ടുകാരും തമ്മില്‍ സംഘര്‍ഷം ഉണ്ടാവുകയും ചെയ്തു. ഈ കേസിലാണ് ഇയാളെ ഇന്നലെ പൊലിസ് കസ്റ്റഡിയിലെടുത്തത്. എന്നാല്‍ ഇന്ന് പുലര്‍ച്ചെ ഫൈജാസിന്റെ വീട് ഭാഗികമായി കത്തി നശിച്ച നിലയില്‍ കണ്ടെത്തുകയായിരുന്നു.

മദ്യപിച്ചുകഴിഞ്ഞാല്‍ ഇയാള്‍ അയല്‍വീടുകളുടെ വാതിലില്‍ മുട്ടി ബഹളം വക്കുന്ന പതിവുണ്ടെന്നും കൗണ്‍സിലര്‍ പറയുന്നു. നാട്ടിലേക്ക് പുറത്തുനിന്ന് ആര് വന്നാലും ഫൈജാസ് അവരെ ചോദ്യം ചെയ്യുമെന്നതാണ് മറ്റൊരു ആരോപണം.

ഇത്തരത്തില്‍ ഒരു വിദ്യാര്‍ത്ഥിയെ കുത്തി പരുക്കേല്‍പ്പിക്കുകയും ഭട്ട് റോഡില്‍ വച്ച് നാട്ടുകാരനായ ഒരാളെ വെട്ടിയും പരുക്കേല്‍പ്പിച്ചിട്ടുണ്ടെന്ന് കൗണ്‍സിലര്‍ ആരോപിക്കുന്നു. ഫൈജാസ് ഒറ്റയ്ക്കാണ് വീട്ടില്‍ താമസിച്ചിരുന്നതെന്നും ഇവിടെ സുഹൃത്തുക്കള്‍ക്കൊപ്പം മദ്യപിക്കുന്നത് പതിവാണെന്നും കൗണ്‍സിലര്‍ പറയുന്നു.