മുംബൈ: ഐപിഎല്ലിൽ ഇന്ന് നടക്കുന്ന ആവേശകരമായ മത്സരത്തിൽ ചെന്നൈ സൂപ്പർ കിങ്‌സും മുംബൈ ഇന്ത്യൻസുമാണ് നേർക്കുനേർ എത്തുന്നത്. ഐപിഎൽ ചരിത്രത്തിലെ എക്കാലത്തെയും മികച്ച ഈ രണ്ട് ടീമുകളുടെ പോരാട്ടത്തെ ആരാധകർ എൽക്ലാസിക്കോ എന്നും വിശേഷിപ്പിക്കാറുണ്ട്. മുംബൈയുടെ ഹോം ഗ്രൗണ്ടായ വാംഖഡെയിൽ രാത്രി 7.30നാണ് മത്സരം നടക്കുന്നത്. ഈ മത്സരത്തിന് മുന്നോടിയായി മുംബൈക്ക് നിരാശ നൽകുന്ന ഒരു വാർത്തയാണ് പുറത്തുവന്നിരിക്കുന്നത്. 

ടീമിന്റെ പ്രധാന സ്പിന്നർമാരിൽ ഒരാളായ കരൺ ശർമ്മ മത്സരത്തിൽ നിന്നും പുറത്തായിരിക്കുകയാണ്. കൈക്ക് പരുക്കേറ്റത്തിന് പിന്നാലെയാണ് താരത്തിന് ഈ മത്സരം നഷ്ടമാവുന്നത്. മത്സരത്തിന് മുന്നോടിയായുള്ള പത്ര സമ്മേളനത്തിൽ ന്യൂസിലാൻഡ് സ്പിന്നർ മിച്ചൽ സാന്റ്നറാണ് ഇക്കാര്യം സ്ഥിതീകരിച്ചത്.  

സൺറൈസേഴ്‌സ് ഹൈദെരാബാദിനെതിരെയുള്ള അവസാന മത്സരത്തിൽ ഫീൽഡ് ചെയ്യുന്നതിനിടെയാണ് താരത്തിന് പരുക്ക് സംഭവിച്ചത്. മത്സരത്തിൽ മുംബൈയുടെ വിജയത്തിൽ നിർണായകമായ പങ്കു വഹിച്ച താരം കൂടിയാണ് കരൺ ശർമ്മ. മത്സരത്തിൽ ഇമ്പാക്ട് പ്ലെയറായി കളത്തിൽ ഇറങ്ങി മൂന്ന് വിക്കറ്റുകളാണ്‌ താരം സ്വന്തമാക്കിയത്. ഇതിനു പിന്നാലെ മത്സരത്തിലെ പ്ലയെർ ഓഫ് ദി മാച്ച് അവാർഡും താരം സ്വന്തമാക്കിയിരുന്നു. 

നിലവിൽ ഏഴ് മത്സരങ്ങളിൽ നിന്നും മൂന്ന് ജയവും നാല് തോൽവിയും അടക്കം ആറ് പോയിന്റുമായി ഏഴാം സ്ഥാനത്താണ് ഹർദിക് പാണ്ഡ്യയും സംഘവും. മറുഭാഗത്ത് അവസാന സ്ഥാനത്താണ് ചെന്നൈ. ഏഴ് മത്സരങ്ങളിൽ നിന്നും രണ്ട് ജയവും അഞ്ചു തോൽവിയുമായി നാല് പോയിന്റാണ് സിഎസ്കെക്കുള്ളത്. 

സീസണിൽ ഇതിനു മുമ്പ് ഇരു ടീമുകളും ഏറ്റുമുട്ടിയപ്പോൾ ചെന്നൈക്കൊപ്പമായിരുന്നു വിജയം. ചെന്നൈയുടെ തട്ടകമായ ചെപ്പോക് സ്റ്റേഡിയത്തിൽ നടന്ന മത്സരത്തിൽ നാല് വിക്കറ്റുകൾക്കായിരുന്നു ധോണിയും കൂട്ടരുടെയും വിജയം. ഈ തോൽവിക്ക് കണക്ക് തീർക്കാനുള്ള സുവർണാവസരവും മുംബൈയുടെ മുന്നിലുള്ളത്. ഇരു ടീമുകൾക്കും പ്ലേ ഓഫ് സാധ്യതകൾ നിലനിർത്തണമെങ്കിൽ വിജയം അനിവാര്യമാണ്. അതുകൊണ്ട് തന്നെ മത്സരം തീപാറുമെന്നുറപ്പാണ്.      

Mumbai Indians Player Karan Sharma will Miss the Match Against CSK In IPL