ന്യൂഡല്‍ഹി: നാല് ദിവസത്തെ ഇന്ത്യന്‍ സന്ദര്‍ശനത്തിനായി അമേരിക്കന്‍ വൈസ് പ്രസിഡണ്ട് ജെഡി വാന്‍സ് ഇന്ന് രാവിലെ ഡല്‍ഹിയിലെത്തി. ഇന്ത്യന്‍ വംശജയായ ഭാര്യ ഉഷയോടൊപ്പം പാലം വ്യോമതാവളത്തിലാണ് അദ്ദേഹം വിമാനമിറങ്ങിയത്.

#WATCH | Delhi: Vice President of the United States, JD Vance, along with Second Lady Usha Vance arrive at Palam airport. pic.twitter.com/iCDdhYLVdz

— ANI (@ANI) April 21, 2025

ഇന്ന് പ്രധാനമന്ത്രി നരേന്ദ്ര മോദിയുമായി കൂടിക്കാഴ്ച നടത്തുന്ന വാന്‍സ് വൈകീട്ട് 6:30 ന് പ്രധാനമന്ത്രിയുടെ ഔദ്യോഗിക വസതിയില്‍ സംഘടിപ്പിക്കുന്ന അത്താഴ വിരുന്നില്‍ പങ്കെടുക്കും. വിദേശകാര്യ മന്ത്രി എസ്. ജയശങ്കര്‍, ദേശീയ സുരക്ഷാ ഉപദേഷ്ടാവ് അജിത് ഡോവല്‍, വിദേശകാര്യ സെക്രട്ടറി വിക്രം മിസ്രി, അമേരിക്കയിലെ ഇന്ത്യന്‍ അംബാസഡര്‍ വിനയ് മോഹന്‍ ഖ്വാത്ര തുടങ്ങിയവര്‍ അത്താഴവിരുന്നിനു മുന്നോടിയായുള്ള കൂടിക്കാഴ്ചയിലും ചര്‍ച്ചയിലും പങ്കെടുക്കും. 

ചര്‍ച്ചയില്‍ ഇന്ത്യ-അമേരിക്ക ബന്ധം, വ്യാപാര തര്‍ക്കങ്ങള്‍, സുരക്ഷ, സഹകരണം തുടങ്ങിയ ഉഭയകക്ഷി വിഷയങ്ങള്‍ ചര്‍ച്ച ചെയ്യും. അമേരിക്ക ഏര്‍പ്പെടുത്തിയ പകരച്ചുങ്കത്തെക്കുറിച്ചുള്ള ചര്‍ച്ചകള്‍ ഇപ്പോഴും തുടരുകയാണ് വ്യാപാര ഇടപാടുകളില്‍ ഗണ്യമായ ഇളവുകള്‍ നേടാനാണ് ഇന്ത്യയുടെ ശ്രമം.

ഡല്‍ഹി സന്ദര്‍ശനത്തിന് ശേഷം വാന്‍സ് ഇന്ന് രാത്രി  ജയ്പൂരിലേക്ക് പോകും. ബുധനാഴ്ച താജ്മഹല്‍ സന്ദര്‍ശനത്തിന് ശേഷം വീണ്ടും ജയ്പൂരിലേക്ക് മടങ്ങുന്ന വാന്‍സ് വ്യാഴാഴ്ച അമേരിക്കയിലേക്ക് തിരിക്കും.

US Vice President JD Vance arrived in Delhi this morning for a four-day visit to India. He landed at the Palam airbase along with his Indian-origin wife Usha.