സിലിക്ക ജെല്‍ എന്നു കേള്‍ക്കുമ്പോള്‍ ഒരുപക്ഷേ ഇതാര്‍ക്കും മനസ്സിലാവില്ല. എന്നാല്‍ കണ്ടാലോ, എല്ലാവര്‍ക്കും ഇതറിയുകയും ചെയ്യാം. നമ്മള്‍ പുതിയ കുപ്പി, ബാഗ്, ഷൂസ് എന്നിവ വാങ്ങുമ്പോള്‍ അതിനുള്ളില്‍ കാണാറുള്ള വെള്ള നിറത്തിലുള്ള ചെറിയൊരു പാക്കറ്റ് ഇല്ലേ. അതിനെയാണ് സിലിക്ക ജെല്‍ എന്ന് പറയുന്നത്.

ഇത് പലപ്പോഴും ഉപയോഗിക്കാതെ നമ്മള്‍ വേഗം ഉപേക്ഷിക്കുകയാണ് ചെയ്യുക. ഈ സിലിക്ക ജെല്ലിന്റെ ഉപയോഗങ്ങളെ കുറിച്ച് അറിഞ്ഞാല്‍ നിങ്ങള്‍ ശരിക്കും ഞെട്ടുക തന്നെ ചെയ്യും. നോക്കാം ഇതിന്റെ ഉപയോഗങ്ങള്‍ എന്തൊക്കെയാണെന്ന്. 

വെള്ളത്തില്‍ വീണാല്‍ പെട്ടെന്നു തന്നെ കേടാവുന്ന ഒന്നാണ് ഇലക്ട്രിക്ക് ഉപകരണങ്ങള്‍. ഏതു രീതിയിലാണെങ്കിലും ഈര്‍പ്പം തട്ടിയാല്‍ ഇവ പെട്ടെന്ന് തന്നെ കേടാവുകയും ചെയ്യും. എന്നാല്‍ ഇത്തരം വസ്തുക്കള്‍ ഈര്‍പ്പം തട്ടാതെ സൂക്ഷിക്കുന്നതിനും പരിമിതികളുണ്ട്.

നിങ്ങളുടെ ഇലക്ട്രിക് ഉപകരണത്തില്‍ നനവുണ്ടായാല്‍ ഉപകരണം കേടുവരുന്നതിനെ തടയാന്‍ സിലിക്ക ജെല്‍ മാത്രം മതി. സിലിക്ക ജെല്ലിന് ഈര്‍പ്പത്തെ വലിച്ചെടുക്കാന്‍ ശേഷിയുണ്ട്. ഇതില്‍ സിലിക്ക ജെല്ലുകള്‍ നിറച്ച് കൊടുത്താല്‍ ഈര്‍പ്പത്തെ വലിച്ചെടുക്കുകയും ഉപകരണത്തെ സംരക്ഷിക്കുകയും ചെയ്യുന്നു. 

തുരുമ്പെടുക്കുന്ന ലോഹങ്ങള്‍ 

ലോഹങ്ങളില്‍ പെട്ടെന്നുതന്നെ തുരുമ്പ് പിടിക്കാറുണ്ട്. എന്നാല്‍ ഇതിന് പരിഹാരം കാണാന്‍ സിലിക്ക ജെല്ലിന് കഴിയും. ഉപകരണങ്ങള്‍ സൂക്ഷിച്ചിരിക്കുന്ന ബോക്‌സിലേക്ക് സിലിക്ക ജെല്‍ പാക്കറ്റായോ അല്ലാതെയോ ഇട്ടു കൊടുത്താല്‍ മതി. ഇത് വായുവില്‍ തങ്ങിനില്‍ക്കുന്ന ഈര്‍പ്പത്തെ വലിച്ചെടുക്കുകയും ലോഹങ്ങളില്‍ തുരുമ്പ് പിടിക്കുന്നതില്‍ നിന്നു സംരക്ഷിക്കുകയും ചെയ്യുന്നു. 

പഴയ ഫോട്ടോ 

പഴയ ഫോട്ടോ ആല്‍ബങ്ങള്‍ പഴയതാകുംതോറും ചിത്രങ്ങള്‍ ഫെയ്ഡായി പോകാറുണ്ട്. ഇങ്ങനെ ഉണ്ടാകുന്നത് തടയാന്‍ ആല്‍ബത്തിലെ പേജുകള്‍ക്കിടയില്‍ സിലിക്ക ജെല്‍ വച്ചുകൊടുത്താല്‍ മാത്രം മതി. പഴയ പുസ്തകങ്ങള്‍ കേടുവരാതിരിക്കാനും പേജുകള്‍ക്കിടയില്‍ സിലിക്ക ജെല്‍ കുറച്ച് ദിവസം സൂക്ഷിച്ചാല്‍ മതി. മാറ്റം നിങ്ങള്‍ക്കു നേരിട്ടു തന്നെ കാണാം.