മംഗളുരു: മംഗളുരുവില്‍ മലയാളി യുവാവിനെ ആള്‍ക്കൂട്ടം മര്‍ദ്ദിച്ചു കൊലപ്പെടുത്തിയ സംഭവത്തില്‍ കൃത്യവിലോപം കാണിച്ച മൂന്നു പൊലിസ് ഉദ്യോഗസ്ഥരെ സസ്‌പെന്റ് ചെയ്തു. മംഗളുരു റൂറല്‍ സ്റ്റേഷന്‍ ഇന്‍സ്‌പെകടര്‍ കെആര്‍ ശിവകുമാര്‍, ഹെഡ് കോണ്‍സറ്റബിള്‍ പി ചന്ദ്ര, കോണ്‍സറ്റബിള്‍ യല്ലലിംഗ എന്നിവരെയാണ് സസ്‌പെന്റ് ചെയ്തത്.

വയനാട് പുല്‍പ്പള്ളിയില്‍ താമസിക്കുന്ന മുച്ചിക്കാടന്‍ കുഞ്ഞായിയുടെ മകന്‍ അഷ്‌റഫി(36)നെയാണ് ഞായറാഴ്ച ഉച്ചകഴിഞ്ഞ് ഇരുപത്തഞ്ചോളം ആള്‍ക്കൂട്ടം മര്‍ദ്ദിച്ച് കൊലപ്പെടുത്തിയത്.

ക്രിക്കറ്റ് മത്സരത്തിനിടെ മൈതാനത്ത് ആക്രമണം ഉണ്ടായെന്നറിഞ്ഞിട്ടും ലാഘവത്തോടെ കൈകാര്യം ചെയ്തതിനാണ് പൊലിസുകാരെ സസ്‌പെന്റ് ചെയ്തത്. മൃതദേഹത്തില്‍ നേരിയ മുറിവെന്നാണ് പൊലിസ് രേഖപ്പെടുത്തിയത്.

സംഭവത്തില്‍ പൊലിസ് പ്രാദേശിക ബിജെപി നേതാക്കള്‍ക്ക് വഴങ്ങിയെന്ന ആക്ഷേപം വ്യാപകമായി ഉയര്‍ന്നിരുന്നു. ആള്‍ക്കൂട്ട കൊലപാതകത്തില്‍ ഇതിനകം ഇരുപതു പേരെ പൊലിസ് അറസ്റ്റു ചെയ്തിട്ടുണ്ട്.

ആള്‍ക്കൂട്ട കൊലപാതകം മൂലമാണ് മരണം സംഭവിച്ചതെന്ന ഫോറന്‍സിക് വിദഗ്ധരുടെ അഭിപ്രായത്തെത്തുടര്‍ന്ന്, ഭാരതീയ ന്യായ സംഹിതയുടെ 103(2), 115(2), 189(2), 190, 191(1) (കലാപം), 191(3), 240 എന്നീ വകുപ്പുകള്‍ പ്രകാരമാണ് പൊലിസ് കേസെടുത്തിട്ടുള്ളത്.