ദുബൈ: യുഎഇയില്‍ താപനില കുതിച്ചുയരുന്നു. രാജ്യത്തുടനീളം ചൂടും ഈര്‍പ്പം നിറഞ്ഞ കാലാവസ്ഥയുമാണുള്ളത്. ദുബൈ, അബൂദബി തുടങ്ങിയ തീരദേശ നഗരങ്ങളില്‍ ഉയര്‍ന്ന താപനിലയാണ് അനുഭവപ്പെടുന്നത്. ഉള്‍ പ്രദേശങ്ങളിലും താപനിലയില്‍ ഗണ്യമായ വര്‍ധനവാണ് രേഖപ്പെടുത്തിയിട്ടുള്ളത്.

ഇന്ന് ഉച്ചയ്ക്ക് 2 മണിയോടെ ബഡാ ദഫാസില്‍ (അല്‍ ദഫ്ര മേഖല) രാജ്യത്തെ ഏറ്റവും ഉയര്‍ന്ന താപനില രേഖപ്പെടുത്തി. 46.2 ഡിഗ്രി സെല്‍ഷ്യസായിരുന്നു ഇവിടത്തെ താപനില.

തീരദേശ പ്രദേശങ്ങളില്‍ താരതമ്യേന ചൂട് കൂടുതലാണ്. 40 ഡിഗ്രിക്കും 44 ഡിഗ്രിക്കും ഇടയിലാണ് തീരദേശ നഗരങ്ങളിലെ താപനില. ഉള്‍നാടന്‍ പ്രദേശങ്ങളില്‍ 42 ഡിഗ്രി സെല്‍ഷ്യസ് മുതല്‍ 45 ഡിഗ്രി സെല്‍ഷ്യസ് വരെ ഉയര്‍ന്ന താപനില അനുഭവപ്പെടുന്നു. പര്‍വതപ്രദേശങ്ങളിലുള്ളവര്‍ക്കാണ് ഈ കനത്ത താപനിലയില്‍ നിന്ന് അല്പമെങ്കിലും ആശ്വാസമുള്ളത്. 35 ഡിഗ്രി സെല്‍ഷ്യസിനും 39 ഡിഗ്രി സെല്‍ഷ്യസിനും ഇടയിലാണ് പര്‍വത പ്രദേശങ്ങളിലെ താപനില.

ഏപ്രില്‍ മുതല്‍ മെയ് വരെയുള്ള കാലയളവ് അന്തരീക്ഷമര്‍ദ്ദത്തില്‍ ഗണ്യമായ ഏറ്റക്കുറച്ചിലുകള്‍ ഉണ്ടാകുന്ന കാലഘട്ടമാണെന്ന് നാഷണല്‍ സെന്റര്‍ ഓഫ് മെറ്റീരിയോളജിയുടെ ഏറ്റവും പുതിയ റിപ്പോര്‍ട്ട് സൂചിപ്പിക്കുന്നു. ഇത് കാലാവസ്ഥാ സാഹചര്യങ്ങളില്‍ ദ്രുതഗതിയിലുള്ള മാറ്റങ്ങള്‍ക്ക് കാരണമാകും. വടക്കന്‍ അര്‍ദ്ധഗോളത്തില്‍ പകല്‍ സമയം ക്രമേണ വര്‍ദ്ധിക്കുന്നു, ഇത് രാജ്യത്തിന്റെ മിക്ക ഭാഗങ്ങളിലും വായുവിന്റെ താപനിലയില്‍ ശ്രദ്ധേയമായ വര്‍ദ്ധനവിന് കാരണമാകുന്നു. മാര്‍ച്ചിനെ അപേക്ഷിച്ച്, ഈ മാസം ശരാശരി വായുവിന്റെ താപനില 3-5 ഡിഗ്രി വര്‍ധിച്ചതായാണ് റിപ്പോര്‍ട്ട്. ഇത് വരാനിരിക്കുന്ന ചൂടുള്ള ദിവസങ്ങളെയാണ് സൂചിപ്പിക്കുന്നത്.

രാജ്യത്ത് നാളെ പൊതുവെ തെളിഞ്ഞ കാലാവസ്ഥയായിരിക്കും. ഭാഗികമായി മേഘാവൃതമായിരിക്കും. തെക്കുകിഴക്ക് നിന്ന് വടക്കുകിഴക്ക് ഭാഗത്തേക്കായിരിക്കും കാറ്റ് പ്രധാനമായും വീശുക. വടക്കോട്ട് നീങ്ങുന്തോറും ഇടയ്ക്കിടെ കാറ്റ് ശക്തി പ്രാപിച്ചേക്കാം.

കാറ്റിന്റെ വേഗത മണിക്കൂറില്‍ 10 മുതല്‍ 25 കിലോമീറ്റര്‍ വരെയാകുമെന്നും കാറ്റിന്റെ വേഗത മണിക്കൂറില്‍ 35 കിലോമീറ്റര്‍ വരെ ഉയരാന്‍ സാധ്യതയുണ്ടെന്നും കാലാവസ്ഥാ നിരീക്ഷണ കേന്ദ്രം അറിയിച്ചു. അറബിക്കടലും ഒമാന്‍ കടലും ശാന്തമായിരിക്കും.

Coastal cities in the UAE are experiencing extreme heat as temperatures soar. Authorities urge residents to take precautions as the heatwave is expected to intensify in the coming days.