ന്യൂഡല്‍ഹി: ദേശീയ തലസ്താന മേഖലയിലും (എന്‍.സി.ആര്‍) ഡല്‍ഹിയിലും ഗാസിയാബാദിലും ശക്തമായ ഇടിമിന്നലും കനത്ത മഴയും അനുഭവപ്പെട്ടു. മഴ ചുട്ടുപൊള്ളുന്ന ഉഷ്ണതരംഗത്തില്‍ നിന്ന് ആശ്വാസം നല്‍കിയെങ്കിലും ശക്തമായ കാറ്റു കാരണം ഉത്തരേന്ത്യയിലെ പലയിടങ്ങളിലും വ്യോമഗതാഗതം തടസ്സപ്പെട്ടു.

പുര്‍ച്ചെ ആരംഭിച്ച മഴയില്‍ മോത്തിബാഗ്, ദ്വാരക അണ്ടര്‍പാസ്, ആര്‍കെ പുരം എന്നിവയുള്‍പ്പെടെ തലസ്ഥാനത്തിന്റെ പല ഭാഗങ്ങളിലും വെള്ളക്കെട്ട് രൂപപ്പെട്ടു.

മേയ് മാസത്തിലെ ആദ്യ മൂന്നു ദിവസങ്ങളില്‍ കനത്ത മഴക്കും ശക്തമായ കാറ്റിനും ഇടിമിന്നലിനും സാധ്യതയുള്ളതിനാല്‍ കാലാവസ്ഥാ വകുപ്പ് തലസ്ഥാനത്ത് യെല്ലോ അലേര്‍ട്ട് പ്രഖ്യാപിച്ചിരുന്നു. അടുത്ത രണ്ടു മണിക്കൂറില്‍ ഡല്‍ഹിയില്‍ ശക്തമായ ഇടിമിന്നലിനും മണിക്കൂറില്‍ 70-80 കിലോമീറ്റര്‍ വേഗത്തിലുള്ള കാറ്റിനുമുള്ള സാധ്യതയുണ്ടെന്ന് കാലാവസ്ഥാ വകുപ്പ് മുന്നറിയിപ്പ് നല്‍കി.

കനത്ത മഴയെ തുടര്‍ന്ന് പല പ്രദേശങ്ങളിലും വെള്ളക്കെട്ട് രൂപപ്പെട്ടു. മിന്റോ ബ്രിഡ്ജ് അണ്ടര്‍പാസില്‍ വെള്ളം കെട്ടിക്കിടക്കുന്നതിനാല്‍ ഒരു വാഹനം ഇവിടെ കുടുങ്ങിയതായി റിപ്പോര്‍ട്ടുണ്ട്. ആര്‍കെ പുരത്തെ മേജര്‍ സോമനാഥ് മാര്‍ഗില്‍ നിന്നുള്ള ദൃശ്യങ്ങളില്‍ ശക്തമായ കാറ്റില്‍ മരങ്ങള്‍ കടപുഴകി വീണതായി കാണാം. ദ്വാരക അണ്ടര്‍പാസിലും രൂക്ഷമായ വെള്ളക്കെട്ടാണ് അനുഭവപ്പെടുന്നത്. 

ശക്തമായ കാറ്റ് ഡല്‍ഹിയെ മാത്രമല്ല ബാധിക്കുക. ഹരിയാനയിലെയും ഉത്തര്‍ പ്രദേശിലെയും ചില ഭാഗങ്ങളെയും ഇത് പ്രതികൂലമായി ബാധിക്കാന്‍ ഇടയുണ്ട്. ഹരിയാനയിലെ യമുനാനഗര്‍, കര്‍ണാല്‍, സഫിഡോണ്‍, പാനിപ്പത്ത്, സോഹാന, പല്‍വാല്‍, നൂഹ്, ഹോദല്‍ എന്നിവിടങ്ങളിലും ഉത്തര്‍ പ്രദേിലെ ഗംഗോഹ്, ഷംലി, കാണ്ഡ്ല എന്നിവിടങ്ങളിലും ശക്തമായ കാറ്റു വീശാന്‍ സാധ്യതയുണ്ട്.

Severe thunderstorms and heavy rainfall hit Delhi, causing waterlogging in several parts of the city. Commuters faced major disruptions as drainage systems were overwhelmed.