ഗസ്സ സിറ്റി: ഇസ്റഈലിന്റെ സമ്പൂർണ ഉപരോധം മൂന്നാം മാസത്തിലേക്ക് കടക്കുമ്പോൾ ഗസ്സയിൽ ഭക്ഷ്യക്ഷാമം രൂക്ഷമാകുന്നു. ഇസ്റഈൽ മാനുഷിക സഹായങ്ങൾ പൂർണമായും തടഞ്ഞതിനെ തുടർന്ന്, ഭക്ഷണത്തിന്റെ അഭാവത്തിൽ ഫലസ്തീൻ മത്സ്യത്തൊഴിലാളികൾ കടലാമ മാംസം കഴിക്കാൻ തുടങ്ങിയതായി റിപ്പോർട്ട്. മുട്ടയിടാൻ കരയിലെത്തുന്ന കടലാമകളെ പിടികൂടി വിൽപ്പന നടത്തുന്ന ഇവർക്ക് ഒരു ആമയ്ക്ക് ഏകദേശം 25 ഡോളർ വില ലഭിക്കുന്നതായി വിവരമുണ്ട്.

"ഗസ്സയിലെ സ്ഥിതി ആളുകളെ കടലാമ മാംസം കഴിക്കേണ്ട അവസ്ഥയിലേക്ക് എത്തിച്ചിരിക്കുന്നു," റഫയിൽ കുടിയിറക്കപ്പെട്ട താമസക്കാരിയായ മറിയം ഹസ്സാൻ പറഞ്ഞു. "ഇത് ഇഷ്ടത്തിന്റെ കാര്യമല്ല, കഴിക്കാൻ മറ്റൊന്നുമില്ലാത്തതിനാലാണ്." ഗസ്സ സിറ്റിയിലെ താമസക്കാരനായ ഇനാസ് സോഷ്യൽ മീഡിയയിൽ കുറിച്ചു: "ടിന്നിലടച്ച ഭക്ഷണം മടുത്തു. കഴിക്കാൻ മറ്റൊന്നുമില്ലാത്തതിനാലാണ് ആളുകൾ ആമകളെ കഴിക്കുന്നത്. ഞങ്ങൾക്ക് അർഹമായ ഭക്ഷണം വേണം." 

 

 

ഐക്യരാഷ്ട്രസഭയും അന്താരാഷ്ട്ര മാധ്യമങ്ങളും ഗസ്സയിലെ പട്ടിണി സ്ഥിതിയിൽ ഗൗരവമായ ആശങ്ക പ്രകടിപ്പിച്ചിട്ടുണ്ട്.  
എന്നാൽ, ഇസ്റഈൽ അതിർത്തികൾ അടച്ച് സഹായ വിതരണം നിർത്തിയതിനാൽ, ഗസ്സ മുനമ്പിലെ ഭക്ഷ്യശാലകളിലും കമ്മ്യൂണിറ്റി അടുക്കളകളിലും കൊള്ളയടിക്കലും മോഷണങ്ങളും വർധിച്ചതായി ഉദ്യോഗസ്ഥർ ചൂണ്ടിക്കാട്ടുന്നു. കഴിഞ്ഞ ദിവസം ഗസ്സയിൽ യുഎൻ പലസ്തീൻ അഭയാർത്ഥി ഏജൻസി (UNRWA) സമുച്ചയം ഉൾപ്പെടെ അഞ്ചോളം സ്ഥലങ്ങളിൽ കൊള്ള സംഭവങ്ങൾ റിപ്പോർട്ട് ചെയ്തു. ഗസ്സ ഗവൺമെന്റ് മീഡിയ ഓഫീസ് ഡയറക്ടർ ഇസ്മായിൽ അൽ-തവാബ്ത, കൊള്ളയടിക്കലുകളെ "ഒറ്റപ്പെട്ട വ്യക്തിഗത പ്രവൃത്തികൾ" എന്ന് വിശേഷിപ്പിച്ചു. എന്നാൽ, ഇസ്റഈലിന്റെ ഉപരോധമാണ് ഈ പ്രതിസന്ധിക്ക് കാരണമെന്ന് അദ്ദേഹം ആരോപിച്ചു.

ഗസ്സ സിറ്റിയിലെ മാലിന്യക്കൂമ്പാരത്തിൽ നിന്ന് കണ്ടെടുത്ത കീടബാധയുള്ള മാവ് അരിച്ചെടുക്കുന്ന ജോലിയാണ്. "ഇതിൽ കീടങ്ങളുണ്ട്, മലിനമാണ്. പക്ഷേ, എന്റെ ആറ് കുട്ടികളെ പോറ്റാൻ ഇതല്ലാതെ മറ്റ് മാർഗമില്ല," ഏകദേശം രണ്ട് മാസമായി ഇസ്റഈൽ ഗസ്സയിലേക്ക് ഒരു ട്രക്ക് സഹായം പോലും അനുവദിക്കാത്തതാണ് ഈ ദുരവസ്ഥയ്ക്ക് കാരണം.

 

 

ഇസ്റഈൽ ഹമാസിനെ സമ്മർദ്ദത്തിലാക്കാൻ മാനുഷിക സഹായം തടഞ്ഞതായാണ് റിപ്പോർട്ട്. എന്നാൽ, ഇത് അന്താരാഷ്ട്ര നിയമലംഘനമാണെന്നും, പട്ടിണിയെ യുദ്ധായുധമായി ഉപയോഗിക്കുന്നത് കുറ്റമാണെന്നും ആരോപിക്കുന്നു. വേൾഡ് ഫുഡ് പ്രോഗ്രാമിന്റെ (WFP) വെയർഹൗസുകൾ ശൂന്യമാണെന്നും, സൂപ്പ് കിച്ചണുകൾ അവസാന സ്റ്റോക്കുകൾ റേഷൻ ചെയ്യുന്നതായും റിപ്പോർട്ടുണ്ട്. ഒരു ബാഗ് മാവിന്റെ വില 100 ഡോളറിന് തുല്യമായതിനാൽ, ഭക്ഷണം വാങ്ങുന്നത് മിക്കവർക്കും താങ്ങാനാവാത്തതായി മാറി. എല്ലാം നഷ്ടപ്പെട്ട് തെരുവിൽ ഇറങ്ങേണ്ടി വന്നവർക്ക് കൊള്ളയടിക്കുകയല്ലാതെ മറ്റ് എന്താണ് മാർ​ഗം.

ആയിരക്കണക്കിന്  നിവാസികൾ ഗസ്സയിലെ യുഎൻ സ്കൂളുകളും വെയർഹൗസുകളും ആക്രമിച്ച് മാവും ടിന്നിലടച്ച ഭക്ഷണവും തേടി. റിമാൽ പരിസരത്ത്, ആളുകൾ കെട്ടിടങ്ങളിലേക്ക് ബലപ്രയോഗത്തിലൂടെ കയറാൻ ശ്രമിച്ചു. ആയുധധാരികൾ തടയാൻ ശ്രമിച്ചപ്പോൾ വെടിവയ്പ്പ് ഉണ്ടായതായും റിപ്പോർട്ടുണ്ട്.

 

 

ഗസ്സയിൽ പോഷകാഹാരക്കുറവ് അനുഭവിക്കുന്ന കുട്ടികളുടെ എണ്ണം അതിവേഗം വർധിക്കുന്നു. കഴിഞ്ഞ മാസം 3,700 കുട്ടികൾക്ക് രോഗം കണ്ടെത്തിയതായി യുഎൻ കണക്കുകൾ വ്യക്തമാക്കുന്നു. ഇത് ഫെബ്രുവരിയെ അപേക്ഷിച്ച് 82% വർധനവാണ്. WFP-യുടെ അടിയന്തര കോർഡിനേറ്റർ യാസ്മിൻ മെയ്‌ധാനെ പറഞ്ഞു: "ഞങ്ങളുടെ ഭക്ഷണ അടുക്കളകൾ നിലച്ചിരിക്കുന്നു. 400,000-ലധികം ആളുകൾക്ക് ഭക്ഷണം നൽകിയിരുന്ന ഈ സംവിധാനം ഇപ്പോൾ തകർന്നു."

 

 

ഇസ്റഈൽ ഉപരോധം നീക്കിയാൽ, ഗസ്സയിലേക്ക് 3,000 ട്രക്കുകൾ സഹായവുമായി എത്താൻ തയ്യാറാണെന്ന് UNRWA വ്യക്തമാക്കി. എന്നാൽ, സമ്പൂർണ ക്ഷാമം ഒഴിവാക്കാൻ ഇസ്റഈൽ നടപടികൾ ആസൂത്രണം ചെയ്യുന്നതായി യാതൊരു സൂചനയും ലഭിച്ചിട്ടില്ല. ഫ്രാൻസ്, ജർമ്മനി, യുകെ തുടങ്ങിയ യൂറോപ്യൻ രാജ്യങ്ങൾ സഹായം അനുവദിക്കണമെന്ന് ആവശ്യപ്പെടുമ്പോൾ, യുഎസ് പ്രസിഡന്റ് ഡൊണാൾഡ് ട്രംപിന്റെ ഭരണകൂടം ഇസ്റഈലിന്റെ  ഉപരോധത്തെ പിന്തുണയ്ക്കുന്നു.

19 മാസത്തോളം നീണ്ട യുദ്ധവും തുടർച്ചയായ വ്യോമ-കര ആക്രമണങ്ങളും ഗസ്സയെ തകർത്തിരിക്കുന്നു. "കൊള്ളയടിക്കലുകൾ വിശപ്പിന്റെയും നിരാശയുടെയും സൂചനയാണ്," പലസ്തീൻ എൻജിഒ ഡയറക്ടർ അംജദ് അൽ-ഷാവ പറഞ്ഞു.