കൊച്ചി: കൈക്കൂലി കേസിൽ കൊച്ചി കോർപ്പറേഷൻ വൈറ്റില സോണൽ ഓഫീസിലെ ഫസ്റ്റ് ഗ്രേഡ് ഓവർസിയർ സ്വപ്ന കഴിഞ്ഞ ദിവസമാണ് വിജിലൻസിന്റെ പിടിയിലായത്. അതേസമയം തന്നെ മേലധികാരികളുടെ വിശ്വാസം നേടി സുപ്രധാന ചുമതലകൾ കൈപ്പറ്റിയ സ്വപ്ന, അഴിമതിയിലൂടെ വരവിനു കവിഞ്ഞ് സ്വത്ത് സമ്പാദിച്ചതായി വിജിലൻസ് സംശയിക്കുന്നു. 2019ൽ തൃശൂർ കോർപ്പറേഷനിൽ ജോലിയിൽ പ്രവേശിച്ച സ്വപ്ന, 2023ൽ കൊച്ചി കോർപ്പറേഷൻ വൈറ്റില ഓഫീസിലേക്ക് സ്ഥലംമാറ്റം നേടി. സ്മാർട്ടായ പ്രവർത്തനത്തിലൂടെ ഉന്നത ഉദ്യോഗസ്ഥരുടെ പ്രീതി നേടിയ ഇവർ, ബിൽഡിംഗ് ഇൻസ്പെക്ടർ പദവിയും കരസ്ഥമാക്കി.

നഗരത്തിന്റെ ഹൃദയഭാഗത്തുള്ള വൈറ്റിലയിൽ കെട്ടിട പെർമിറ്റുമായി ബന്ധപ്പെട്ട നിരവധി അപേക്ഷകൾ സ്വപ്നയുടെ മേശപ്പുറത്തെത്തി. ഇവയിൽ അഴിമതി നടന്നിട്ടുണ്ടോ എന്ന് വിജിലൻസ് പരിശോധിക്കുകയാണ്. കോർപ്പറേഷൻ പരിധിയിലെ എല്ലാ ബിൽഡിംഗ് പെർമിറ്റ് രേഖകളും വിജിലൻസ് റെയ്ഡിൽ പിടിച്ചെടുത്തു. വരവിനു മീതെ സ്വത്ത് സമ്പാദിച്ചിട്ടുണ്ടോ എന്നതിലും അന്വേഷണം ആരംഭിച്ചു.

വൈറ്റില സ്വദേശിയുടെ അഞ്ച് നില കെട്ടിടത്തിന്റെ പ്ലാൻ അംഗീകരിക്കാൻ നാല് മാസം വൈകിപ്പിച്ച ശേഷം, ഓരോ നിലയ്ക്കും 5,000 രൂപ വീതം 25,000 രൂപ സ്വപ്ന ആവശ്യപ്പെട്ടു. സാമ്പത്തിക ബുദ്ധിമുട്ട് ചൂണ്ടിക്കാട്ടിയപ്പോൾ 15,000 രൂപയായി കുറച്ചു. ഇത് കൈപ്പറ്റുന്നതിനിടെയാണ് ഇന്നലെ വിജിലൻസ് ഇവരെ കൈയോടെ പിടികൂടിയത്. തൃശൂർ വിജിലൻസ് കോടതിയിൽ ഹാജരാക്കിയ സ്വപ്നയെ റിമാൻഡ് ചെയ്തു.

മാസങ്ങളായി കൊച്ചി കോർപ്പറേഷൻ ഓഫീസുകൾ വിജിലൻസിന്റെ നിരീക്ഷണത്തിലാണ്. എന്നാൽ, ഏജന്റുമാർ വഴിയും രഹസ്യ കേന്ദ്രങ്ങളിലും കൈക്കൂലി കൈമാറിയിരുന്ന അഴിമതിക്കാർ ഇതുവരെ രക്ഷപ്പെട്ടിരുന്നു. നേരത്തെ സ്വപ്നയ്ക്കെതിരെ കൈക്കൂലി ആരോപണം ഉയർന്നിരുന്നെങ്കിലും, പരാതിക്കാരൻ തെളിവുകൾ കൈമാറിയതോടെയാണ് അറസ്റ്റ് സാധ്യമായത്.

അവധിക്കായി മക്കളുമൊത്ത് നാട്ടിലേക്ക് പോകാനിരുന്ന സ്വപ്ന, പൊന്നുരുന്നിയിൽ വഴിയരികിൽ പണവുമായി എത്താൻ അപേക്ഷകനോട് ആവശ്യപ്പെട്ടു. മൂന്ന് മക്കളുടെ മുന്നിൽവെച് വിജിലൻസ് ഇവരെ കസ്റ്റഡിയിലെടുത്തു. മക്കൾ മണിക്കൂറുകളോളം കാറിൽ കഴിച്ചുകൂട്ടി. പിന്നീട് അച്ഛൻ എത്തി മക്കളെ കൊണ്ടുപോയ ശേഷം വിജിലൻസ് അറസ്റ്റ് രേഖപ്പെടുത്തി. ആറ് വർഷത്തെ സർവീസിൽ സ്വപ്ന വരവിനു മീതെ സ്വത്ത് സമ്പാദിച്ചിട്ടുണ്ടോ എന്നതാണ് വിജിലൻസിന്റെ അടുത്ത പരിശോധന. 

Swapna, a First Grade Overseer at Kochi Corporation's Vyttila Zonal Office, was arrested for accepting a bribe. Gaining her superiors' trust with smart work, she secured key roles, including Building Inspector. Vigilance is probing her alleged corruption, seizing permit records and investigating disproportionate assets. Caught demanding ₹15,000 for a building plan approval, Swapna was remanded after a dramatic arrest in front of her children.