ക്രൊയേഷ്യൻ ഇതിഹാസം ലുക്ക മോഡ്രിച്ചിനെ ഇറ്റാലിയൻ വമ്പന്മാരായ എസി മിലാൻ സ്വന്തമാക്കാൻ ഒരുങ്ങുന്നതായി റിപ്പോർട്ട്. എസി മിലാനിയിൽ ചേരാൻ മോഡ്രിച്ച് സമ്മതിച്ചു എന്നാണ് ക്ലബ്ബിന്റെ സ്പോർട്ടിങ് ഡയറക്ടർ അറിയിച്ചത്. ഫിഫ ക്ലബ്ബ് ലോകകപ്പ് ടൂർണമെന്റ് കഴിഞ്ഞാൽ ഉടൻ ക്രൊയേഷ്യൻ മിഡ്ഫീൽഡർ എസി മിലാനിൽ എത്തുമെന്നാണ് പ്രതീക്ഷിക്കുന്നത്. 

ഈ സീസൺ അവസാനത്തോടുകൂടിയാണ് മോഡ്രിച്ച് റയൽ മാഡ്രിഡ് ഒപ്പമുള്ള തന്റെ ഐതിഹാസികമായ ഫുട്ബോൾ യാത്ര അവസാനിപ്പിച്ചത്. 2012ൽ സ്പാനിഷ് ക്ലബിന് വേണ്ടി അരങ്ങേറ്റം കുറിച്ച മോഡ്രിച്ച് ഐതിഹാസികമായ ഫുട്ബോൾ കരിയറാണ് കെട്ടിപ്പടുത്തുയർത്തിയത്. ആറ് ചാമ്പ്യൻസ് ലീഗുകളും നാല് ലാലിഗ കിരീടങ്ങളും ഉൾപ്പെടെ 28 ട്രോഫികളാണ് താരം റയലിനൊപ്പം നേടിയത്. 2012ൽ ബാഴ്‌സലോണയ്‌ക്കെതിരായ മത്സരത്തിലാണ് ലൂക്ക റയലിനായി അരങ്ങേറ്റം കുറിച്ചത്.

മത്സരത്തിൽ ജർമൻ താരം മെസ്യൂട് ഓസിലിനെ പിൻവലിച്ചാണ് കോച്ച് ലൂക്കയെ കളത്തിൽ ഇറക്കിയത്. പിന്നീട് ലൂക്ക മോഡ്രിച്ച് റയൽ മാഡ്രിഡിന്റെ മധ്യനിര അടക്കിഭരിക്കുന്നതിനാണ് ഫുട്ബോൾ ലോകം സാക്ഷ്യം വഹിച്ചത്. 

അതേസമയം കഴിഞ്ഞ സീസണിൽ സിരി എയിൽ എട്ടാം സ്ഥാനത്ത് ആയിരുന്നു എസി മിലാൻ ഫിനിഷ് ചെയ്തിരുന്നത്. 38 മത്സരങ്ങളിൽ നിന്നും 18 വിജയവും 9 സമനിലയും 11 തോൽവിയും അടക്കം 63 പോയിന്റ് ആയിരുന്നു ഇറ്റാലിയൻ ക്ലബ്ബിന്റെ കൈവശമുണ്ടായിരുന്നത്. അതുകൊണ്ടുതന്നെ കഴിഞ്ഞതവണ നഷ്ടപ്പെട്ട ലീഗ് കിരീടം ഇത്തവണ സൂപ്പർ താരങ്ങളെ ടീമിലെത്തിച്ചുകൊണ്ട് തിരിച്ചെടുക്കാൻ ആയിരിക്കും എസി മിലാൻ ലക്ഷ്യം വെക്കുക.

Italian giants AC Milan are reportedly preparing to sign Croatian legend Luka Modric