കണ്ണൂർ: കണ്ണൂരിൽ വൻ ഓൺലൈൻ തട്ടിപ്പ്. മട്ടന്നൂർ സ്വദേശിയായ ഡോക്ടർക്ക് നഷ്ടമായത് 4,43,20,000 രൂപ. ജില്ലയിൽ റിപ്പോർട്ട് ചെയ്ത ഏറ്റവും വലിയ ഓൺലൈൻ തട്ടിപ്പ് കൂടിയാണിത്. വാട്ടസ് ആപ്പ് സന്ദേശം കണ്ട് വ്യാജ ഷെയർ ട്രേഡിങ് പ്ലാറ്റ്‌ഫോം വഴി ട്രേഡിങ് ചെയ്യാൻ ശ്രമിച്ചതിലൂടെയാണ് പണം നഷ്ടമായത്. തട്ടിപ്പുകാർ വിവിധ അക്കൗണ്ടുകളിലേക്ക് ഡോക്ടറെക്കൊണ്ട് പണം നിക്ഷേപിപ്പിക്കുകയായിരുന്നു. പിന്നീട് പണം പിൻവലിക്കാൻ ശ്രമിച്ചപ്പോൾ വിവിധ ചാർജുകൾ എന്ന് പറഞ്ഞു വീണ്ടും തുക വാങ്ങിയെടുക്കുകയും നിക്ഷേപിച്ച പണമോ വാഗ്ദാനം ചെയ്ത ലാഭമോ നൽകാതെ കബളിപ്പിച്ചുവെന്നുമാണ് പരാതി. ഏപ്രിൽ മുതൽ ജൂൺ 25 വരെയുള്ള കാലയളവിൽ പലതവണകളിലായാണ് പണം തട്ടിയത്. കണ്ണൂർ സിറ്റി സൈബർ ക്രൈം പൊലിസ്  കേസ് രജിസ്റ്റർ ചെയ്ത് അന്വേഷണം ആരംഭിച്ചു. 

പാർട് ടൈം ജോലി, ഓൺലൈൻ ലോൺ; തട്ടിപ്പിന് വഴികൾ പലത് 

കണ്ണൂർ: വാട്സ്ആപ്പിലെ പാർട് ടൈം ജോലി വാഗ്ദാന പരസ്യത്തിന് പിറകേ പോയ പിണറായി സ്വദേശിക്കും  6,25,000 രൂപ നഷ്ടപ്പെട്ടു. തനിക്ക് ലഭിച്ച നിർദേശപ്രകാരം വിവിധ ടാസ്‌കുകൾക്ക് പല അക്കൗണ്ടുകളിലേക്ക് പണം നൽകിയെങ്കിലും നിക്ഷേപിച്ച തുകയോ വാഗ്ദാനം ചെയ്ത ലാഭമോ നൽകാതെ വഞ്ചിച്ചുവെന്നാണ് പരാതി. സമാന തട്ടിപ്പിൽ ചക്കരക്കൽ സ്വദേശിക്ക് 2,05,000 രൂപയും നഷ്ടമായി. ഫേസ്ബുക്കിൽ പരസ്യം കണ്ട് പണം നൽകിയിട്ടും ഓർഡർ ചെയ്ത സാധനം നൽകാതെ പറ്റിച്ചുവെന്നാണ് മറ്റൊരു പരാതി. തട്ടിപ്പിനിരയായ പിണറായി സ്വദേശിക്ക് 74,000 രൂപയാണ് നഷ്ടമായത്. സമാനമായ തട്ടിപ്പിൽ കതിരൂർ സ്വദേശിക്ക് 43,000 രൂപയും മറ്റൊരു പിണറായി സ്വദേശിക്ക് 21,400 രൂപയും നഷ്ടപ്പെട്ടിട്ടുണ്ട്. ഓൺലൈൻ ലോൺ നൽകാമെന്ന് വാഗ്ദാനം നൽകി വിവിധ ചാർജുകളെന്ന് പറഞ്ഞ് പിണറായി സ്വദേശിയിൽ നിന്നും 64,999 രൂപ തട്ടിയെടുത്തതായും പരാതിയുണ്ട്.

ALSO READ: ന്യൂനമര്‍ദ്ദം; മഴ കനക്കും; അഞ്ച് ജില്ലകളില്‍ ഓറഞ്ച് അലര്‍ട്ട്; ഏഴിടത്ത് വിദ്യാഭ്യാസ സ്ഥാപനങ്ങള്‍ക്ക് അവധി

online scam in Kannur Doctor loses 45 crore