മനാമ: ബഹിരാകാശമേഖലയുമായി ബന്ധപ്പെട്ട് ഐക്യരാഷ്ട്രസഭക്ക് കീഴിലുള്ള കമ്മിറ്റി ഓണ്‍ ദി പീസ് ഫുള്‍ യൂസസ് ഓഫ് ഔട്ടര്‍ സ്‌പേസ് (Committee on the Peaceful Uses of Outer Space - COPUOS) രണ്ടാം ചെയര്‍പേഴ്‌സന്‍ സ്ഥാനത്തേക്ക് തെരഞ്ഞെടുക്കപ്പെട്ട് ബഹ്‌റൈനിലെ ശൈഖ ഹെസ്സ ബിന്‍ത് അലി അല്‍ ഖലീഫ. ഈ സ്ഥാനത്തേക്ക് തിരഞ്ഞെടുക്കപ്പെടുന്ന ആദ്യ അറബ് മുസ്‌ലിം വനിതയാണ് ശൈഖ ഹെസ്സ. വിയന്നയില്‍ കഴിഞ്ഞദിവസം നടന്ന കമ്മിറ്റിയുടെ 68ാമത് സമ്മേളനത്തിലാണ് ശൈഖ ഹെസ്സ തെരഞ്ഞെടുക്കപ്പെട്ടത്. 

ബിഎസ്എയുടെ നാമനിര്‍ദ്ദേശത്തെത്തുടര്‍ന്ന് അംഗരാജ്യങ്ങള്‍ ശൈഖ ഹെസ്സ ബിന്‍ത് അലിയുടെ നിയമനത്തെ ഏകകണ്ഠമായി അംഗീകരിച്ചു. ബഹിരാകാശ പര്യവേഷണത്തില്‍ അന്താരാഷ്ട്ര സഹകരണത്തിനായുള്ള മുന്‍നിര യുഎന്‍ കമ്മിറ്റിയാണ് Committee on the Peaceful Uses of Outer Space. അന്താരാഷ്ട്ര സഹകരണം ശക്തിപ്പെടുത്തുന്നതിനും ബഹിരാകാശ പര്യവേക്ഷണവുമായി ബന്ധപ്പെട്ട നിയമപരമായ പ്രശ്‌നങ്ങള്‍ ചര്‍ച്ച ചെയ്യുന്നതിനും വേണ്ടി 1959ലാണ് ഐക്യരാഷ്ട്രസഭ സിഒപിയുഒഎസ് സ്ഥാപിച്ചത്. ബഹ്‌റൈന്‍ സ്‌പേസ് ഏജന്‍സിയെ (Bahrain Space Agency - BSA) പ്രതിനിധീകരിച്ചാണ് ശൈഖ ഹെസ്സ സമ്മേളനത്തില്‍ പങ്കെടുത്തത്. 

ബഹിരാകാശ രംഗത്ത് ബഹ്‌റൈന്‍ കൈവരിച്ച സമീപകാല നേട്ടങ്ങള്‍ ശൈഖ ഹെസ്സ സമിതി യോഗത്തില്‍ എടുത്ത് പറഞ്ഞു. ഭൂമി നിരീക്ഷണത്തിനായി തദ്ദേശീയമായി രൂപകല്‍പ്പന ചെയ്ത ആദ്യത്തെ ഉപഗ്രഹമായ 'അല്‍ മുന്‍തര്‍' വിക്ഷേപിച്ചത്, ബ്രിട്ടീഷ് സ്ഥാപനങ്ങളുമായി സഹകരിച്ച് കാര്‍ബണ്‍ ഉദ്‌വമനം നിരീക്ഷിക്കുന്നതിനുള്ള 'കോ2സാറ്റ്' പദ്ധതിയുടെ രണ്ടാം ഘട്ടം പൂര്‍ത്തിയാക്കിയത്, ഒമാനുമായുള്ള തന്ത്രപരമായ സഹകരണത്തിലൂടെ ഭ്രമണപഥത്തില്‍ കൃത്രിമബുദ്ധി സാങ്കേതികവിദ്യകള്‍ പരീക്ഷിച്ചത്, പ്രാദേശിക കാലാവസ്ഥാ നിരീക്ഷണത്തിനായുള്ള അറബ് സാറ്റലൈറ്റ് 813 സംരംഭത്തില്‍ സജീവ പങ്കാളിത്തം, മൂന്ന് ചാന്ദ്ര പര്യവേക്ഷണ ദൗത്യങ്ങളില്‍ പങ്കാളിത്തം എന്നിവയുള്‍പ്പെടെ ബഹ്‌റൈന്റെ ബഹിരാകാശ നേട്ടങ്ങളും അവര്‍ ഓര്‍മിപ്പിച്ചു. 

ഉന്നതതല സാങ്കേതിക വേദികളില്‍ തീരുമാനമെടുക്കുന്നതില്‍ അറബ് സ്ത്രീകളുടെ പങ്കിനുള്ള അന്താരാഷ്ട്ര അംഗീകാരമാണ് തന്റെ നിയമനമെന്ന് ഷൈഖ ഹെസ്സ ബിന്‍ത് അലി പറഞ്ഞു. 'സ്‌പേസ് ഫോര്‍ വുമണ്‍', 'സ്‌പേസ് ഫോര്‍ വാട്ടര്‍' തുടങ്ങിയ യുഎന്‍ സംരംഭങ്ങള്‍ക്കുള്ള ബഹ്‌റൈന്റെ പിന്തുണയും വികസ്വര രാജ്യങ്ങള്‍ക്ക് ബഹിരാകാശ സാങ്കേതികവിദ്യ ലഭ്യമാക്കാന്‍ സഹായിക്കുന്നതിലുള്ള ശ്രമങ്ങളും അവര്‍ തന്റെ പ്രസംഗത്തില്‍ ചൂണ്ടിക്കാട്ടി.

The Bahrain Space Agency (SPA) announced the election of Shaikha Hessa bint Ali Al Khalifa as the Second Vice-Chair of the Committee on the Peaceful Uses of Outer Space (COPUOS) at 68th COPUOS session held in Austria. Shaikha Hessa bint Ali's appointment makes her the first Arab Muslim woman to hold this position.